Vavolombelon’ny fitiavany ny Tompo
Mofonaina anio: Alatsinainy, faha 25 Desambra 2017
Vavolombelon'ny fitiavany ny Tompo
Lioka 2.8-14
8 Ary nisy mpiandry ondry tamin'izany tany izany nitoetra tany an-tsaha nitandrina ny ondriny tamin'ny alina. 9 Ary nisy anjelin'ny Tompo nitsangana teo anilany, ary ny voninahitry ny Tompo nanelatrelatra manodidina azy, ka raiki-tahotra indrindra izy. 10 Ary hoy ny anjely taminy: Aza matahotra; fa, indro, milaza teny soa mahafaly aminareo aho, dia fifaliana lehibe izay ho an'ny olona rehetra; 11 fa Mpamonjy no teraka ho anareo anie ao an-tanànan'i Davida, dia Kristy Tompo. 12 Ary izao no ho famantarana ho anareo: ianareo hahita Zazakely voahodidina lamban-jaza sady mandry ao am-pihinanam-bilona; 13 Ary nisy anjely maro be avy any an-danitra niseho tampoka niaraka tamin'ilay anjely teo ka nidera an'Andriamanitra nanao hoe: 14 Voninahitra any amin'ny avo Indrindra ho an'Andriamanitra! Ary fiadanana ho et? ambonin'ny tany amin'ny olona ankasitrahany*. [*Na: Fankasitrahana ho amin'ny olona]Vavolombelon’ny fitiavany ny Tompo
Lioka 2.8-14
Mpiandry ondry tany an-tsaha
1-Isehoan’ny anjelin’ny Tompo
Mpiandry ondry tany an-tsaha no nisehoan’ny anjely , ka nanambarany ny vaovao mahafaly mikasika ny fahaterahan’i Jesoa Mpamonjy . Nomeny toky mba tsy hatahotra sady nanehoana ny Voninahitry ny Tompo nanelatrelatra manodidina azy. Any an-tsaha anatin’ny alina feno aizina , amperinasa , ao anatin’izany no miseho ny anjelin’ny Tompo sy ny voninahiny . Andriamanitra dia mampiseho ny voninahiny amin’izay tiany hisehoana sy hanehoana izany , na iza na iza isika , ary na aiza na aiza toerana misy antsika , na inona na inona saranga misy antsika eo amin’ny fiaraha-monina . Izao fisehoan’ny anjely amin’ny mpiandry ondry izao dia vavolombelon’ny fitiavan’ny Tompo hamonjy antsika ary tsy mizaha tavan’olona Izy .
2-Ilazana vaovao mahafaly
Na iza na iza teo amin’ny toeran’ny mpiandry ondry ireo , dia tsy maintsy ho taitra sy hatahotra aloha . Nampitony izany ny anjelin’ny Tompo ka nilaza tamin’ireo mba tsy hatahotra sady hanambara vaovao mahafaly taminy . Ny nahaterahan’i Jesoa Kristy Tompo no Teny soa mahafaly na Filazantsara , sady fifaliana lehibe ho an’ny olona rehetra ka mitondra fiadanana ho an’ny firenena . Izay mandray an’i Jesoa ho Tompo sy Mpamonjy azy anio no hahita ny tena fiadanana eo amin’ny androm-piainany ary ny voninahitry ny Tompo nanelatrelatra manodidina azy .
Fanontaniana:
Birao Sekoly Alahady FOIBE FJKM