Vavolombelon’ny fanekeny ny Tompo
Mofonaina anio: Zoma, faha 03 Febroary 2017
Vavolombelon’ny fanekeny ny Tompo
Jeremia 1.4-10
4 Tonga tamiko ny tenin'i Jehovah nanao hoe: 5 Hatry ny fony ianao tsy mbola noforoniko tany an-kibo no efa fantatro, ary hatry ny fony ianao tsy mbola teraka no efa nohamasiniko sy notendreko ho mpaminany ho an'ny firenena. 6 Ary hoy kosa aho: Indrisy, Jehovah Tompo ô! indro, tsy mahay mandaha-teny aho, fa mbola zaza. 7 Fa hoy Jehovah tamiko: Aza manao hoe: Mbola zaza aho; fa handeha amin'izay rehetra hanirahako anao ianao, ary izay rehetra handidiako anao no hambaranao. 8 Aza matahotra azy ianao; fa momba anao hamonjy anao Aho, hoy Jehovah. 9 Dia naninjitra ny tànany Jehovah ka nanendry ny vavako, ary hoy Jehovah tamiko: Indro, efa nataoko ao am-bavanao ny teniko, 10 ary indro Aho manendry anao izao andro anio izao hanam-pahefana amin'ny firenena sy ny fanjakana hanongotra sy hanjera sy handrava sy handrodana ary hanorina sy hamboly.Vavolombelon’ny fanekeny ny Tompo
Jeremia 1.4-10
Miantso ny olona ho vavolombelony ny Tompo
.
1-Izy no namolavola olona ho vavolombelony (and 5)
Amin’ny alalan’ny teniny izay miantefa amintsika no handraisana ny antsony . Hoy indrindra Jeremia hoe : « Tonga tamiko ny Tenin’i Jehovah (and4). Hevero ange izao Tenin’ny Tompo izao : « …mbola tsy noforoniko tao an-kibon-dreninao akory ianao dia efa fantatro , ary mbola tsy teraka akory ianao dia efa natokako hanompo Ahy … »(DIEM). Tsy kisendrasendra akory araka izany ny fifidianany antsika ho vavolombelony , fantany avokoa ny momba antsika rehetra hatrany am-pamoronana .
2-Izy no mampijoro ho vavolombelony (and7)
Matetika ny olona tena voaantson’ny Tompo hanao ny asany dia ahatsiaro ho malemy sy tsy hahavita . Toy izany koa no nahazo an’i Jeremia ka nilazany hoe : « Indrisy Jehovah Tompo ô , indro tsy mahay mandahanteny aho, fa mbola zaza (and6) . Toky no omeny fa Izy ihany no manendry ny vavany hiteny izay rehetra holazaina sy mampanao izay rehetra anirahana , ary manome fahefana « hanongotrasy hanjera , hanapotika sy handrava ary hanorina sy hamboly « (and10). Sahia, ary aza matahotra na menatra ny ho vavolombelon’ny Tompo .
Fanontaniana :
Tsaroanao ve ny fotoana nandraisanao ny antson’ny Tompo ?
Birao Birao Sekoly Alahady FOIBE