VAVOLOMBELON’NY FANEKENY NY TOMPO
Mofonaina anio: Talata, faha 07 Febroary 2017
VAVOLOMBELON'NY FANEKENY NY TOMPO
MARKA 14. 43-52
43 Ary niaraka tamin'izay, raha mbola niteny Izy, dia avy Jodasy, isan'ny roa ambin'ny folo lahy, sady nisy vahoaka niaraka taminy, nitondra sabatra sy langilangy, nirahin'ny lohan'ny mpisorona sy ny mpanora-dalàna ary ny loholona. 44 Ary ilay hamadika Azy efa nanome famantarana ireo ka nanao hoe: Izay horohako no Izy; sambory Izy ka ento, fa aza avela ho afaka. 45 Ary rehefa tonga izy, dia nanatona an'i Jesosy niaraka tamin'izay ka nanao hoe: Raby ô! dia nanoroka Azy izy. 46 Ary ny olona naninjitra ny tànany taminy ka nisambotra Azy. 47 Ary ny anankiray tamin'izay teo anilany nanatsoaka ny sabany, dia nikapa ny mpanompon'ny mpisoronabe ka nahafaka ny sofiny. 48 Ary Jesosy namaly ka nanao taminy hoe: Mivoaka mitondra sabatra sy langilangy hisambotra Ahy toy ny hisambotra jiolahy va ianareo? 49 Teo aminareo isan'andro Aho an-kianjan'ny tempoly, nefa tsy nisambotra Ahy ianareo; fa mba hahatanteraka ny Soratra Masina izao. 50 Ary samy nandao Azy izy rehetra ka nandositra. 51 Ary nisy zatovo anankiray nanaraka Azy, ka lamba hariry madinika fotsiny ihany no nitafiany, ary nosamborin'ny olona teo izy. 52 Dia navelany teny aminy ny lambany hariry madinika, ka nandositra nitanjaka izy.VAVOLOMBELON’NY FANEKENY NY TOMPO
MARKA 14. 43-52
Nanaiky hosamborina i Jesoa
Vavolombelon’ny fanekena ataon’ny Tompo amintsika izao faneken’i Jesoa hosamborina sy hohelohina izao .
1-Ny olona akaiky ihany no namadika Azy (and43,44 ,45)
Fihetsika feno fihatsarambelatsihy no netin’i Jodasy namadihana ny Tompo tamin’ny fitenenany manao hoe : « Raby » izy midika hoe : « mpampianatra hajaina ». Mampieritreritra fatratra antsika izay efa mpanara-dia ny Tompo ny toe-javatra toy izao . Indraindray tokoa mantsy dia ny olona izay heverina fa tokony ho mpitarika ao amin’ny fiangonana indray no lasa lehiben’ny mpanohitra ka misakana ny Filazantsara . Nanaiky hosamborina i Jesoa , ny mpianatra rehetra kosa nandao Azy …(and50) .
2-Ho fahatanterahan’ny Soratra masina (and49)
Nasehon’i Jesoa tamin’ireo mpiambina izay nisambotra Azy fatsy nilaina akory ny nitondra fitaovam-piadiana satria tsy jiolahy Izy (and48). Efa voatendry mialoha izay rehetra hisehp momba Azy . Koa dia vavolombelon’ny fahatanterahan’izay rehetra voalaza ao amin’ny Soratra masina izao fanekeny izao mba ho fampihavanana antsika amin’ Andriamanitra . Ny hafatra ho antsika amin’izany dia ny fanekena sy fankatoavana izay rehetra ambaran’ny Soratra masina.
Fanontaniana :
Vonona ve isika ny hijoro ho vavolombelon’ny Tompo ka tsy handao Azy ?
Birao Sekoly Alahady FOIBE FJKM