Sahia mitory ny fahamarinana
Mofonaina anio: Asabotsy, faha 07 Jolay 2018
Sahia mitory ny fahamarinana
Isaia 45.11-13
11 Izao no lazan'i Jehovah ny Iray Masin'ny Isiraely, dia ny namorona azy: Ny amin'ny zavatra ho avy no anontanio Ahy; ary ny zanako sy ny asan'ny tanako dia aoka ho adidiko ihany. 12 Izaho no nanao ny tany sy nahary ny olona eo amboniny; ny tanako ihany no namelatra ny lanitra sy nandahatra* ny eny aminy rehetra. [Heb. nandidy] 13 Izaho no nanaitra azy io tamin'ny fahamarinana, ary ny lalany rehetra dia haravoko avokoa; izy no hanao ny tanànako, ary ny oloko voababo dia halefany, nefa tsy amim-bola amin-karena, hoy Jehovah, Tompon'ny maro.Sahia mitory ny fahamarinana
Isaia 45.11-13
Ilay Andriamanitra marina
« ny zanako sy ny asan’ny tànako dia aoka ho adidiko »
1-Manana ny fahefany amin’ny zavatra rehetra
Mampiasa izay olona tiany ampiasaina sy hanehoana ny heriny Andriamanitra. Nofidiny manokana eto i Kyrosy tamin’ny fanafahana ny olony tany Babylona. Ahariharin’ Andriamanitra fa asany manokana izany fanafahana izany. Tompon’ny hery sy ny fahefana rehetra Izy .Izy no nahary , namorona ny zavatra rehetra. Noho izany rehefa toe-javatra mahakasika ny fiainan’ny olona dia Azy izany . Izy no manapa-kevitra , Izy no maneho ny fahefany ka tsy misy mahasakana izany. Azo itokiana Ilay Tompon’ny hery sy ny fahefana rehetra. Koa matokia Azy fa zanany, asan’ny tànany ianao. Tsy mamela anao ho irery Izy. Miasa ho famonjena hatrany izy.
2-Manomana drafi-pamonjena ho an’ny olony
Manana drafitra manokana entiny manatanteraka ny fanafahana ny olona any Babylona Andriamanitra. Nifidy manokana i Kyrosy Izy. Ahariharin’Andriamanitra eto fa Izy araka izany no nanomana, nandrindra, nandamina ny làlana rehetra nizoran’i Kyrosy tamin’ny fanatanterahana izany (and. 13). Tsarovy fa Ilay Andriamanitra marina dia mihevitra mandrakariva ny mahasoa ny fiainanao. Efa nasehony tao amin’i Jesoa Kristy ny drafitra ho amin’ny famonjena, ny fanavotana anao ho afaka amin’ny fatoran’i satana. Azo antoka ny fanavotana anao tamin’ny alalan’i Jesoa Kristy. Miorena ao amin’i Jesoa ianao,fa Izy irery ihany no Mpamonjy marina sy azo antoka ho anao.
Fanontaniana:
Zarao amin’ny hafa ny fahatsapanao teo amin’ny fiainanao fa zanak’Andriamanitra ianao, asan’ny tànany .
Birao Sekoly Alahady FOIBE FJKM