Sahia manohitra ny kolikoly
Mofonaina anio: Alahady, faha 16 Septambra 2018
Sahia manohitra ny kolikoly
Hebreo 13.1-6
1 [Anatra sy fanaovam-beloma] Aoka haharitra ny fitiavana ny rahalahy. 2 Aza manadino ny fampiantranoam-bahiny; fa tamin'izany dia nampiantrano anjely ny sasany, nefa tsy fantany. 3 Tsarovy izay mifatotra, ho toy ny miara-mifatotra aminy ianareo, ary izay ampahorina, satria mbola eo amin'ny tena koa ianareo. 4 Aoka hanan-kaja amin'ny olona rehetra ny fanambadiana, ary aoka tsy ho voaloto ny fandriana; fa ny mpijangajanga sy ny mpaka vadin'olona dia hohelohin'Andriamanitra. 5 Aoka tsy ho amin'ny fitiavam-bola ny toe-tsainareo, fa mianina amin'izay anananareo; fa hoy Izy: "Izaho tsy handao anao mihitsy na hahafoy anao akory" (Jos. 1.5). 6 Ka dia sahy manao hoe isika: "Jehovah no Mpamonjy ahy, ka tsy hatahotra aho; Inona no azon'ny olona atao amiko?" (Sal 118. 6).Sahia manohitra ny kolikoly
Hebreo 13.1-6
« Aoka haharitra ny fitiavana ny Rahalahy » (and1)
1-Ampiantranoy ny vahiny 
Vahiny eto ny olona avy any amin’ny toerana niaviany mandeha any amin’ny tsy azy, ka tsy manan-kialofana. Tsy maintsy ampiantranoina izy ireny . Ny vahiny ambaran’ny Soratra masina tamin’izany dia ireo mpitory ny Filazantsara mandeha an-tany lavitra tsy mbola fantany .
2-Afaho ny voagadra
Migadra indrindra no tiana ambara amin’ny hoe: mifatotra eto. Ny olona manam-pitiavana dia tsy manenji-dresy fotsiny fa manampy hatrany ireo voagadra amin’ny endrika sy fomba maro samihafa .
3-Hamafiso orina ny tokantrano 
Maro ny antony mahapotika ny fanambadiana, na ny tokantrano. Ny tsy fisian’ny fitiavana ampy hampifankatia ny mpivady no anton’izany .Voalaza eto hoe: fijangajangana sy fakana vadin’olona no lasa fanaon’ny sasany . Tsy mampateza ary manimba fanambadiana izany .Hamafiso ny fitiavana. Mety hiteny iska hoe:tsy fitiavam-bady no resaka eto fa fitiava-namana , nefa fantaro fa antsoina hoe : namana ny vady amin’ny faritra sasany eto amintsika .
4-Aza atakalo vola ny fitiavana
Mila vola sy mampiasa vola avokoa ny olona rehetra , na ny mpino sy ny fiangonana aza. I Paoly dia miteny hoe: fototry ny ratsy rehetra ny fitiavam-bola (1 Tim 6.10) .Koa aoka tsy ho ny fitiavam-bola no hibaiko ny olona fa ny fifankatiavana izay manam-pitiavana kosa dia afaka mandefitra amin’ny zavatra rehetra izay ho an’ny tenany .
Fanontaniana:
Birao Sekoly Alahady FOIBE FJKM