Ny olona manompo an’Andriamanitra

Talata, faha 21 Oktobra 2025

Ny olona manompo an’Andriamanitra

Mofonaina anio: Talata, faha 21 Oktobra 2025

Sal.92. 1-11 / HF 48/ Vavaka / Mofonaina / Vavaka / Hira 548

Amosa 5,21 - 24
21 Halako, eny, laviko ny andro firavoravoanareo, ary tsy ho hanitra ankasitrahana amiko ny fivorianareo masina. 22 Na dia ateranareo fanatitra dorana sy fanatitra hohanina aza Aho, dia tsy sitrako izany; Ny zanak'omby mifahy aterinareo ho fanati-pihavanana dia tsy hojereko akory. 23 Atsaharo ny finaonaonan'ny hiranareo*, fa maharenina Ahy; Fa tsy hihaino ny fanenon'ny lokanganareo* Aho. [Heb. Hiranao, lokanganao] 24 Ary aoka ny fitsarana hanalonalona toy ny rano, ary ny fahamarinana toy ny renirano tsy mety ritra.

 

Amosa 5. 21-24

Ny olona manompo an’Andriamanitra

1- Marina amin’ny fivavahana (And. 21-23)

Tamin’ny andron’i Amosa dia nazoto nivavaka ny olona: namonjy ireo fivoriana ara-pivavahana. Naredona ny hira nandritra ny andro firavoravoana, nazoto nanatitra ireo fanatitra ny olona. Saingy nolavin’Andriamanitra avokoa izany. Tamin’ny endrika ivelany fotsiny ihany no nanaovana ireo fombam-pivavahana ireo fa tsy tena tamin’ny fo tokoa. Araka izany, ny fivavahana amin’ny fo arahin’ireo fomba mifanaraka amin’izany no takian’ Andriamanitra amin’ny olona, fa tsy amin’ny fombafomba fotsiny ihany. Ary izany no itaomana ny Kristiana ankehitriny mba hanompo an’i Jesoa Kristy amin’ny finoana marina tokoa.

2- Marina ara-pitsarana (And. 24)

Tao amin’ny Fanjakana Avaratra no nitondran’ny mpaminany Amosa hafatra. Nanjaka ny tsy fahamarinana ara-pitsarana: nanjaka ny kolikoly, ny fanararaotana ireo mahantra, tsy nisy ny fahamarinana. Nitaky ny hisian’ny fahamarinana ara-pitsarana ny mpaminany. Araka izany, takiana amin’ny olona milaza ny tenany ho kristiana, manana andraikitra eo amin’ny fitsarana, ny hanao ny fitsarana marina, lavitry ny kolikoly, fitsarana ho fialofan’ny malemy tokoa satria izany no vokatra tsara indrindra mendrika atolotra ho an’ny Tompo. Koa manaova ny marina sy ny rariny ary hitsiny eo amin’ny andraikitra raisinao ho voninahitr’i Jesoa Kristy. Jesoa Kristy dia Fahamarinana, ka ny olona rehetra mivavaka Aminy dia tsy maintsy manao ny marina araka an’i Kristy.

Fanontaniana:

Ahoana ny fomba hianana ny fahamarinan ‘i Jesoa Kristy?

Sampana Sekoly Alahady Foibe