Ny olona manana an’iKristy
Mofonaina anio: Talata, faha 04 Aogositra 2020
FILIPIANA 1.12-21
FILIPIANA 1.12-21
12 [Ny toetr'i Paoly tao amin'ny fifatorana, sy ny fanantenany] Ary tiako ho fantatrareo, ry rahalahy, fa izay zavatra nanjo ahy dia efa tonga fampandrosoana ny filazantsara kosa; 13 ka ao amin'i Kristy ny fifatorako dia fantatry ny mpiambina andriana rehetra* mbamin'ny olona hafa rehetra; [* Gr. mpiambina pretoriana rehetra; na: eran'ny pretoria] 14 ary ny ankabiazan'ny rahalahy dia efa matoky ao amin'ny Tompo noho ny fifatorako ka mihasahisahy kokoa hitory ny tenin'Andriamanitra tsy amin'ny tahotra. 15 Fialonana sy fifandirana aza no itorian'ny sasany an'i Kristy, ary fifaliana kosa ny an'ny sasany; 16 fitiavana ny an'ny sasany, satria fantany fa voatendry ho mpanafa-tsiny ny filazantsara aho; 17 fifampiandaniana kosa no itorian'ny sasany an'i Kristy, fa tsy mba fo madio, ka mihevitra hanampy fahoriana ny fifatorako. 18 Ahoana ary no izy, afa-tsy izao? Amin'ny atao rehetra, na amin'ny fihatsaram-belatsihy, na amin'ny marina, dia Kristy no torina, ary mifaly amin'izany aho; eny, mbola hifaly ihany aho. 19 Fa fantatro fa ho tonga famonjena ahy izany noho ny fangatahanareo sy ny fanomezana* ny Fanahin'i Jesosy Kristy, [* Na: fanomezan'] 20 araka ny hafatratry ny faniriako sy ny fanantenako fa tsy hahazo henatra aho, na amin'inona na amin'inona; fa amin'ny fahasahiana rehetra, tahaka ny amin'ny mandrakariva, dia ankehitriny koa no hankalazana an'i Kristy ao amin'ny tenako, na amin'ny fiainana, na amin'ny fahafatesana. 21 Fa Kristy no anton'ny ahavelomako, ary ny fahafatesana no hahazoako tombony.Ny olona manana an’iKristy
Miavaka I Paoly Apostoly eo amin’ny fanarahan-dia satria raha isan’ireo mpanenjika ny Tompo tamin’ny hafanampo mihitsy izy tany am-boalohany dia niova ka lasa mpanara-dia ny Tompo indray tamin’ny hafanampo be indrindra koa rehefa nisehoan’ny Tompo . Nahavita nanohitra ireo mpiara-dia taminy fahiny aza izy . Ataon’ny mpahay Baiboly hoe : “ilay Misionera ngezalahy indrindra” izy noho ny asa misiona vitany . Ankoatra izany , nahasoratra foto-pampianarana miavaka tokoa izy (Gal 2.20/Fil 1.21. Eo anatrehan’izany , atao hoe : manana an’I Kristy izy satria :
1-Nahafoy tena
Raha ny zava- boalaza eo amin’ny and 12-13 dia toa vao mainka mifaly aza I Paoly noho ny zavatra manjo azy . Voalaza mantsy fa mifatotra noho ny amin’I Kristy izy , izany hoe: migadra noho ny fanarahan-dia ny Tompo . Tsy mampaninona azy anefa izany noho ny fitiavany ny Tompo Andriamanitra , satria efa niova ho mpanara-dia ny Tompo izy ka nahafoy ny zavatra rehetra , eny hatramin’ny ainy aza.
2-Nitarika ny hafa ho sahy amin’ny fitoriana koa .
Lazaina hoe: mpialoha làlana ny mpitory ny Filazantsara i Paoly satria noho ny fahitan’izy ireo na ny fandrenesany ihany aza , izay nataon’I Paoly dia nahatonga azy ireo sahy mitory ny Filazantsaran’I Kristy koa. Mampahatsiaro ny tantaran’ny Maritiora Malagasy indrindra izany ( ny nahitan-dRafaralahy Andriamazoto an-dRasalama ) ka nahatonga ny ran’izy ireny ho zary zezika hampandrobona ny Fiangonana kristiana teto Madagasikara .
Fanontaniana :
Amin’ny sehatra inona no ahafoizan’ny olona tena amin’izao fotoana izao ?
Sampana Sekoly Alahady FOIBE FJKM