Ny olom-boafidin’Andriamanitra
Mofonaina anio: Alarobia, faha 19 Jolay 2023
2Timoty 2. 8-13
2 Timoty 2,8 - 13
8 Tsarovy Jesosy Kristy Izay natsangana tamin'ny maty, dia Ilay avy tamin'ny taranak'i Davida, araka ny filazantsarako, 9 izay iaretako fahoriana hatramin'ny fatorana aza, hoatra ny mpanao ratsy; nefa ny tenin'Andriamanitra dia tsy mba voafatotra. 10 Izany no iaretako ny zavatra rehetra noho ny amin'ny olom-boafidy, mba hahazoan'ireny koa famonjena. dia izay ao amin'i Kristy Jesosy. mbamin'ny voninahitra mandrakizay. 11 Mahatoky izao teny izao: Fa raha miara-maty aminy isika, dia hiara-belona aminy koa; 12 raha miaritra isika, dia hiara-manjaka aminy; raha mandà Azy isika, Izy kosa handà antsika; 13 fa na dia tsy matoky Azy aza isika, dia mbola mahatoky ihany Izy, fa tsy mahazo mandà ny tenany.Ny olom-boafidin’Andriamanitra
1- Miaritra fahoriana ho famonjena ny hafa
«Izany no iaretako ny zavatra rehetra noho ny amin’ny olom-boafidy, mba hahazoan’ireny koa famonjena... » (and.10) Niaritra fahoriana, fatorana, nampidirina tao an-tranomaizina i Paoly Apostoly noho ny amin’ny Filazantsara mba hamonjena ny olom- boafidy. Ny olom-boafidy tiana hambara amin’izany dia ireo izay mandre ny Filazantsara ka mino. Noho izany, aza gaga raha nanolo-tena ho olom-boafidin Andriamanitra ianao ka miaritra fahoriana noho ny amin’ny Filazantsara , satria misy olona nofidin’Andriamanitra tiany hovonjena amin’ny alalanao any ho any. Ny fandrenesan’ireny olona ireny ny Anaran’i Jesoa Kristy no mahatonga azy hino an’i Jesoa Kristy. Ho anao olom-boafidin’Andriamanitra, mivonona hiaritra fahoriana noho ny Filazantsara.
2- Manantena hiara-belona amin’i Kristy
« Mahatoky izao teny izao: Fa raha miara-maty aminy isika, dia hiara-belona aminy koa » (and. 11) Rehefa manaiky hiaritra fahoriana noho ny amin’ny Filazantsara ny olom-boafidin’ Andriamanitra, dia mahazo antoka fa miombona amin’i Jesoa Kristy. Ary tsy fiombonana amin’ny finoana ihany izany fa manantena hanatri-maso an’i Jesoa Kristy rahatrizay. Araka izany, tsy very maina ny fiaretan’ny olom-boafidin’ Andriamanitra noho ny amin’ny Filazantsara fa misy valiny lehibe, dia ny fiarahana manjaka amin’i Jesoa Kristy. Koa aza kivy na ketraka raha miaritra fahoriana noho ny amin’ny Filazantsara, aza mihemotra fa mahareta hatramin’ny farany satria efa nanomana valim-pitia lehibe ho anao, dia ny fiainana mandrakizay. Ny fanantenana kristiana dia mitoetra amin’ny teny fampanantenana tsy miova nataon’Andriamanitra amin’ny alalan’i Jesoa Kristy.
Fanontaniana :
Hatraiza ny fiaretanao fahoriana noho ny filazantsara?
Sampana Sekoly Alahady FOIBE FJKM