Ny loza mpahazo ny olona
Mofonaina anio: Alatsinainy, faha 03 Aogositra 2020
APOKALYPSY 2.8-11
APOKALYPSY 2.8-11
8 [Smyrna] Ary soraty ho amin'ny anjelin'ny fiangonana* any Smyrna: Izao no lazain'ny Voalohany sy ny Farany, Izay efa maty, nefa velona indray: [* Gr. eklesia] 9 Fantatro ny fahorianao sy ny fahantranao (nefa manan-karena ianao), ary ny fitenenan-dratsy* ataon'izay milaza ny tenany ho Jiosy, kanjo tsy izy, fa synagogan'i Satana. [* Gr. blasfemia; izahao Mat. 9, 3) 10 Aza matahotra izay efa hiaretanao; indro, ny devoly efa hanao ny sasany aminareo ao an-tranomaizina, mba ho voazaha toetra ianareo, ary hanam-pahoriana hafoloana. Aoka ho mahatoky hatramin'ny fahafatesana ianao, dia homeko anao ny satro-boninahitra fiainana. 11 Izay manan-tsofina, aoka izy hihaino izay lazain'ny Fanahy amin'ny fiangonana*. Izay maharesy dia tsy hosimban'ny fahafatesana faharoa. [* Gr. eklesia]Ny loza mpahazo ny olona
Araka ny voalaza eto amin’ny and 9 dia misy telo karazana ny loza mpahazo ny olona :
1-Ny fahoriana
Toejavatra mafy sy sarotra maharary , mampitomany , mampamoifo mpahazo ny olona ny fahoriana ary mety hihatra amana aina mihitsy aza izany . Ny zava-nisy nahatonga ny fanehoana ny fahoriana eto dia ny nataon’ny mpitondra tsy mivavaka mankahala sy manaratsy mpivavaka ka manenjika sy mihevitra ny hamongotra azy ireny ary izay ilay hoe : mampitondra fahoriana .
2-Ny fahantrana :
Vokatry ny fifandraisan’ny olona samy olona eo amin’ny fiaraha-monina izany , satria miovaova izao fiainana izao . Voalaza hoe : nahantra ny olona teto nefa ny tena marina dia nampahantraina tahaka izay nisy tamin’ny kristiana Hebreo fahiny (Heb 10.34) . Raha ny marina dia fahantrana hita ety ivelany ihany izany , fa manankarena ao anaty kosa izy noho ny fifandraisany tamin’ny Tompo . Ity ilay atao hoe : “joko mihasolanga” . Ampitahao amin’ny zava-nisy tany Laodikia (Apo 3.17) izay antsoina kosa hoe : “solanga mihajoko”
3-Ny fitenenan-dratsy ataon’ny milaza ny tenany ho Jiosy
Ny fanaratsiana indrindra no ambara amin’izany izay mahakasika ny sehatry ny fivavahana . Mivondrona izy ireo , tsy voatery ho any ivelany fa ao anaty fiangonana mihitsy , olona mifanerasera mihitsy , nefa dia tena mahasahy manaratsy .Tsy ireo ihany akory ny zava-mahazo ny olona , fa entina hilazana ny santionany amin’izay zava-manjo ireo . Tsy mamela ny olona ho irery ny Tompo , satria Izy no efa niharan’ireny ka manana vahaolana amin’izany (Jereo Mat 11.28) .
Fanontaniana :
Inona no vahaolana omen’ny Tompo ireo tra- pahoriana ?
Sampana Sekoly Alahady FOIBE FJKM