Ny herin’ny fitsanganan’ny Tompo
Mofonaina anio: Talata, faha 11 Aprily 2023
ISAIA 52.7-12
ISAIA 52.7-12
7 Akory ny hatsaran'ny tongotr'iry mitondra teny soa mahafaly er? an-tendrombohitra sady mitory fiadanana! Dia izay mitondra teny soa mahafaly sady mitory famonjena, eny, izay manao amin'i Ziona hoe: Mpanjaka Andriamanitrao! 8 Injany ny feon'ny mpitilinao! Manandratra ny feony izy ka miara-mihoby; fa ho faly izy mahita mifanatri-maso ny hodian'i Jehovah ho any Ziona. 9 Velomy ny hoby, ry fitoeran-drava any Jerosalema; Fa Jehovah efa nampionona ny olony sady efa nanavotra an'i Jerosalema. 10 Jehovah efa nampiseho* ny sandriny masina teo imason'ny firenena rehetra; ary ny faran'ny tany rehetra hahita ny famonjen'Andriamanitsika. [Heb. nampitanjaka] 11 Mialà, mialà ianareo, mivoaha, aza mikasika izay maloto, mivoaha avy eo aminy; madiova, ianareo izay mitondra ny fanak'i Jehovah. 12 Fa tsy tampoka no hivoahanareo, ary tsy lositra no handehananareo; fa Jehovah no hitarika anareo eo aloha, ary Andriamanitry ny Isiraely no ho vodi-lalanareo.Ny herin’ny fitsanganan’ny Tompo
1-Ambaran’ny mpitondra teny soa mahafaly
« Akory ny hatsaran‘ny tongotr’iry mitondra teny soa mahafaly ery an-tendrombohitra » (and7). Fifaliana lehibe ho an’ny vahoaka ny mahatsinjo ny mpanjaka izay mipoitra eny an-tendrombohitra ,nitondra fandresena miezinezina avy niady sady mitondra vaovao mahafaly . Maneho ny Tompo sy ny fandreseny ary ny voninahiny ity fanoharana ity .Teny soa mahafaly mamelombelona fanantenana.
2-Mitondra fiadanana
Misy teny telo mifampiankina sy mifampitohy izay voalaza eto : fiadanana ,teny soa mahafaly ,famonjena. Mpanjaka mitondra fiadanana ,teny soa mahafaly ary famonjena .Tanteraka tamin’ny alalan’ny fandresen ‘i Jesoa Kristy ny fahafatesana ireo rehetra ireo . Jesoa Kristy Tompo no manome fiadanana ho antsika . Ny fiadanany no avelany ho antsika (Jao 14.27) . Izy no Mpamonjy antsika .
3-Mampiharihary ny Tenin’Andriamanitra
« Jehovah efa nampiseho ny sandriny masina teo imason’ny firenena rehetra » (and10) .Manoloana ny fahababoana izay mianjady amin’ny vahoakany dia maneho teny fampanantenana tandrify izany ny Tompo. Ny fandresen’i Jesoa ny fahafatesana dia maneho ara-bakiteny ny fahatanterahan’ity faminaniana voalaza eto ity .
4-Maneho ny fiarovan’Andriamanitra
« Fa Jehovah no hitarika anareo eo aloha ,ary Andriamanitry ny Israely no ho vodilàlanareo » (and12) .Ny Avo indrindra no manaiky hitantana sy hiaro ary hiara-dàlana amintsika.
Fanontaniana:
Tanisao ny fahatanterahan’ity faminanian’Isaia ity tamin’ny alalan’i Jesoa Kristy .
Sampana Sekoly Alahady FOIBE FJKM