Ny fomba handovana fanjakan’Andriamanitra
Mofonaina anio: Asabotsy, faha 15 Martsa 2025
Marka 4. 10-20
Marka 4. 10-20
10 Ary raha tao amin'ny mangingina Izy, dia nanontany Azy ny amin'ny fanoharana ireo nomba Azy mbamin'ny roa ambin'ny folo lahy. 11 Ary hoy Izy taminy: Hianareo no efa nomena ny zava-miafina ny amin'ny fanjakan'Andriamanitra; fa amin'ireny izay any ivelany kosa ny zavatra rehetra dia atao amin'ny fanoharana; 12 mba hijery mandrakariva ihany izy, fa tsy hahita; ary mba handre mandrakariva ihany izy, fa tsy hahafantatra; fandrao hibebaka izy, ka havela ny helony (Isa. 6. 9, 10). 13 Ary hoy Izy taminy: Tsy azonareo va ilay fanoharana teo? koa hataonareo ahoana no fahafantatra ny fanoharana rehetra? 14 Ny mpamafy dia mamafy ny teny. 15 Ary ireto no ilay teo amoron-dalana, dia izay amafazana ny teny, fa rehefa nandre izy, dia avy miaraka amin'izay Satana ka manaisotra ny teny izay nafafy tao aminy. 16 Ary tahaka izany koa, ireto no ilay voafafy teny amin'ny tany marivo ambony vatolampy, dia izay mandre ny teny ka malaky mandray izany amin'ny hafaliana; 17 nefa tsy manam-paka ao anatiny ireny, fa maharitra vetivety foana; koa rehefa afaka izany, ka tonga izay fahoriana na fanenjehana noho ny teny, dia tafintohina miaraka amin'izay izy. 18 Ary misy hafa koa izay voafafy teny amin'ny tsilo, dia ireo no ilay nandre ny teny, 19 fa ny fiahiahiana izao fiainana izao sy ny fitaky ny harena ary ny filàna ny zavatra hafa miditra, dia mangeja ny teny, ka tsy mamoa izy. 20 Ary ireto no ilay voafafy teny amin'ny tany tsara, dia izay mandre ny teny ka mandray azy dia mamoa: ny sasany avy telo-polo heny, ny sasany avy enim-polo heny, ary ny sasany avy zato heny.Ny fomba handovana fanjakan’Andriamanitra
1. Ampahafantarina ny mpianatra
« Hianareo no efa nomena ny zava-miafina ny amin’ny fanjakan’Andriamanitra; …» (And. 11)
Nanontany an’i Jesoa mangingina ny hevitry ny fanoharana momba ny voa nafafy ny mpianatra. Namaly i Jesoa ka nilaza fa nomena tombony manokana ny mpianatra hahalala mba hahazoany mibebaka. Nasarotina ny fahazoana ny hevitry ny filazantsara aminy fandrao mibebaka ny hafa. Ny kristiana, mpianatr’i Jesoa dia mahazo tombony amin’ny fahafantarana ny voalazan’ny Soratra Masina. Ka raha mandre toriteny ianao, misy tokony hibebahana, dia mibebaha mba hahazoanao mandova ny fanjakan’ Andriamanitra.
2. Ny fitomboan’ny Tenin’Andriamanitra ao anaty
« Ary ireto no ilay voafafy teny amin’ny tany tsara, ny sasany avy telo-polo heny, … » (And. 20)
Rehefa mandre ny Tenin’ Andriamanitra ny olona dia misy tsy mitombo ao anatin’ny olona: esorin’i satana, levon’ny fahoriana na fanenjehana na fahatafintohinana, gejain’ny harena sy ny filan-javatra. Amin’ny olona mandray ny teny ka mitombo ao anatiny izany dia tsy manam-pahataperana ny famoany. Mba handovanao ny fanjakan’Andriamanitra ary, dia ekeo hitombo tsy mitsahatra ao anatinao ny Tenin’i Kristy. Aza avela hisy na inona na inona hangeja na hanakana ny fitomboan’ny Tenin’i Kristy ao anatinao dia handova ny fanjakan’ Andriamanitra ianao.
Fanontaniana
Inona avy ireo sakana tsy ahafahan’ny Tenin’i Kristy mitombo ao anatinao?
Sampana Sekoly Alahady Foibe