Ny fitsanganan’i Jesoa tamin’ny maty
Mofonaina anio: Alarobia, faha 22 Aprily 2020
LIOKA 24.44-49
44 Dia hoy Izy taminy: Izao no teniko izay nolazaiko taminareo, fony mbola tao aminareo Aho, fa tsy maintsy ho tanteraka izay rehetra nanoratana Ahy teo amin'ny lalàn'i Mosesy sy ny mpaminany ary ny Salamo. 45 Dia nanokatra ny sain'ireo Izy hahalala ny Soratra Masina. 46 Ary hoy Izy taminy: Izany no voasoratra, fa Kristy hiaritra ka hitsangana amin'ny maty amin'ny andro fahatelo; 47 ary mba hotorina amin'ny anarany ny fibebahana sy ny famelan-keloka amin'ny firenena rehetra, manomboka eto Jerosalema. 48 Ary ianareo no vavolombelon'izany. 49 Ary, indro, Izaho mampitondra ny teny fikasan'ny Raiko ho anareo; fa mitoera eto an-tanàna mandra-panafiana anareo amin'ny hery avy any amin'ny avo.Ny fitsanganan’i Jesoa tamin’ny maty
1-Maneho ny fahatanterahan’ny faminaniana
“Fa tsy maintsy ho tanteraka izay rehetra nanoratana Ahy teo amin’ny lalànan’i Mosesy sy ny mpaminany ary ny salamo” (and44). Ny lalàn’i Mosesy sy ny mpaminany ary ny salamo dia manamarika ireo fizarana telo lehibe amin’ny Testamenta taloha Hebreo . Naminany ny amin’I Kristy hateraky ny virijiny ny Testamenta taloha(Isa 7.14) . Efa voasoratra mialoha fa ao Betlehema no hahaterahan’i Jesoa (Mika 5.2) . Misy ny mpialoha làlana dia Jaona mpanao batisa (Zak9.9). Ny Sal 16.6-11 dia naneho faminaniana ny amin’ny hitsangan’ i Jesoa amin’ny maty. “Fa tsy ho foinao ho any amin’ny fiainan-tsy hita ny aiko ,tsy hamela ny iray masinao ho latsaka ao amin’ny lavaka ianao” (Sal 16.10).Araka izany , ny mahakasika an’i Jesoa sy ny fanavotana ny olombelona amin’ny alalany dia efa nomanin’Andriamanitra hatrany am-piandohana.
2-Mitondra fibebahana sy famelankeloka amin’ny firenena rehetra
Fitiavana lalina no nasehon’i Jesoa ho antsika . Nahafoy ny ainy ho antsika Izy . Tsy mora no niaretany ny kapoka , latsa ,eso sy ireo fanarabiana ary fabalam-baraka isan-karazany .Koa aza avela ho very maina ny fanolorantenan’ny Tompo izay mariky ny fitiavany . Anjarantsika ny mandini-tena. Fantaro fa ny fizirizirianao hanohy ireo filan’ny nofo sy ireo fahazaran-dratsy izay efa nandatsahan’I Jesoa ny Rany teo amin’ny hazo fijaliana dia midika fanombohana azy fanindroany indray.
Fanontaniana:
Inona no andrasan’nyTompo amintsika taorian’ny nandatsahany ny Rany teo amin’ny hazo fijaliana?
Sampana Sekoly Alahady FOIBE FJKM