Mibebaha eo anatrehan’ny Tompo
Mofonaina anio: Asabotsy, faha 03 Martsa 2018
Mibebaha eo anatrehan'ny Tompo
Daniela 9.15-19
15 Koa ankehitriny, Tompo Andriamanitray ô, Izay nitondra ny olonao nivoaka avy tany amin'ny tany Egypta tamin'ny tanana mahery ka nanao anarana ho Anao tahaka ny amin'izao anio izao, efa nanota izahay, efa nanao ratsy izahay. 16 Tompo ô, mifona aminao aho, araka ny fahamarinanao rehetra, aoka re hionona ny fahatezeranao sy ny fahaviniranao amin'i Jerosalema tanànanao, tendrombohitrao masina, fa ny helokay sy ny fahotan'ny razanay no nahatonga an'i Jerosalema sy ny olonao ho latsa amin'izay rehetra manodidina anay. 17 Fa ankehitriny, ry Andriamanitray ô, henoy ny fivavaky ny mpanomponao sy ny fifonany, ary ampamirapirato ny tavanao amin'ny fitoeranao masina izay efa foana, satria Tompo Hianao. 18 Andriamanitra ô, atongilano ny sofinao, ka mihainoa; ahirato ny masonao, ka jereo ny fahafoananay sy ny tanàna izay nantsoina amin'ny anaranao; fa tsy amin'ny fahamarinanay no andoaranay ny fifonanay eto anatrehanao, fa amin'ny halehiben'ny indrafonao. 19 Tompo ô, mandrenesa, Tompo ô, mamelà heloka; Tompo ô, mihainoa, ka miasà; aza ela Hianao, ry Andriamanitro ô noho ny aminao; fa ny tanànanao sy ny olonao dia nantsoina amin'ny anaranao.Mibebaha eo anatrehan’ny Tompo
Daniela 9.15-19
Tsy ny olona rehetra no manaiky hanetry tena sy hifona amin’ Andriamanitra tahaka izao nataon’i Daniela izao . Malaky manamarin-tena ny olona ka tsy mihaino ny tenin’ny mpanompon’ Andriamanitra izay mitondra hafatra ho azy . Mihatra amin’ny vahoaka rehetra ny vokatry ny tsy firosoana mba hanatona amin’ny fanetretena.
1-Aoka ho marina ny fibebahana
Vavaka sy fifonana amin’ny fifadiankanina sy ny lamba fisaonana ary ny lavenona (and3) no ataon’i Daniela . Mahatsiaro ho tomponandraikitra amin’ny heloka sy ny fahotan’ny firenena izy . Manao fitarainana noho ireo fahadisoana rehetra (and5-14) fa izany no fibebahana marina. Mitady ny tavan’ny Tompo mba ho vita fihavanana Aminy indray (and15-16) . Miverina mahatsiaro fa Izy no Mmonjy fa tsy misy hafa .
2-Aoka hatoky ny famindrampon’ny Tompo
Miseho eto ny fanehoana ny finoana ka tanisainy fa mihaino ny Tompo , mijery ny Tompo ary mamela heloka ny Tompo (and17-19). Izay mivavaka àry dia olona feno fahatokiana ilay hivavahana ary mahazo antoka sahady fa ny Tompo Andriamanitra no mpamela heloka . Manatona mitady famindrampo isika raha mivavaka toy izany ka matokia. Izay fitarainana izao dia tsy noho ny fitadiavana famonjena fa ny fanandratana fa Andriamanitra Tompon’ny hery sy ny fahefana tokoa Ilay Jesoa Kristy Mpamonjy antsika ary azo hatonina amin’ny fo mibebaka sady matoky ny Tompo mpamindra fo sy mpamela heloka.
Fanontaniana:
Inona no vavaka fifonana sy fibebahana efa nataonao ?
Birao Sekoly Alahady FOIBE FJKM