Miasà amin’ny fatahorana an’Andriamanitra
Mofonaina anio: Asabotsy, faha 12 Septambra 2020
JAKOBA 5.16-20
JAKOBA 5.16-20
16 Koa mifaneke heloka ianareo, ary mifampivavaha, mba ho sitrana ianareo. Ny fiàsan'ny fivavaky ny marina dia mahery indrindra. 17 Elia dia olona tahaka antsika ihany, ary izy nahery nivavaka mba tsy hilatsahan'ny ranonorana; dia tsy nilatsaka tamin'ny tany ny ranonorana telo taona sy enim-bolana. 18 Ary nivavaka indray izy, dia nandatsaka ranonorana ny lanitra, ka nahavokatra ny tany. 19 Ry rahalahiko, raha misy eo aminareo miala amin'ny fahamarinana, ary misy anankiray mampibebaka azy, 20 aoka ho fantany fa izay mampibebaka ny mpanota hiala amin'ny lalan'ny fahadisoany dia hamonjy fanahy tsy ho faty sady hanarona heloka be.Miasà amin’ny fatahorana an’Andriamanitra
1-Mifaneke heloka , mifampivavaha mba ho sitrana
Matetika dia ny tsy famelana heloka eo anivon’ny fiombonana kristiana tamin’ny fahadisoana natao no tsy mampandroso , fa mitarika ho amin’ny fihemorana . Misakana ny vavaka ataontsika mpino ny fahotana ka tsy hananantsika fahombiazana . Asaina mitsotra isika mba ho ambinina ary ho sitrana ka afaka mifandray amin’Andriamanitra sy ny mpiara-mivavaka. Ny herin’Andriamanitra miasa eo amintsika tsirairay koa no ananantsika fatahorana Azy . Koa aoka isika hifampiaiky heloka , hifampivavaka mba ho sitrana , fa hoy ny Soratra Masina : » Fa ny helokareo no efitra mampisaraka anareo amin’ Andriamanitra » (Isaia 59.2) . Jesoa Kristy dia efa namela ny helotsika , ka tokony hifamela isika (Kol 3.13).
2-Maharitra amin’ny fivavahana marina
Elia dia lehilahy manam-pinoana , miasa tamin’ny fatahorana . Mino izy fa Andriamanitra dia afaka miditra an-tseahtea eo amin’ny sehatry ny natiora, ary mino koa izy fa Andriamanitra dia mihaino ny vavaka ataon’ny olona marina (and13,16. Sal 34.6. 2 Tes 3.1 ) . Mitondra hery ho an’ny asa fanompoana tokoa ny fahamarinan’ny vavaka atao , vavaka tsy misalasala na mihambahamba , vavaka feno faharetana handresena an’i satana. Mampisandratra ny ara-panahy , ahafahana mandray ny fanomezam-pahasoavana avy amin’ny Fanahy . Aoka àry mba ho marina ny vavaka ataontsika , ary haharitra amin’izay nekena .
Fanontaniana :
Marina ao amin’ny Tompo ve ny vavaka ataonao ?
Sampana Sekoly Alahady FOIBE FJKM