Miantsoa fanafahana avy amin’ ny Tompo
Mofonaina anio: Asabotsy, faha 30 Jona 2018
Miantsoa fanafahana avy amin' ny Tompo
Salamo 144.6-11
6 Ampitselatselaro ny helatra, ka ampielezo ireo; Alefao ny zana-tsipìkanao, ka ampifanaritaho ireo; 7 Ahinjiro avy any ambony ny tananao; Afaho aho, ka vonjeo amin'ny rano be, Dia amin'ny tanan'ny hafa firenena, 8 Izay miteny zava-poana amin'ny vavany, Ary ny tànany ankavanana dia tanana ankavanana mamitaka. 9 Andriamanitra ô, hihira fihiram-baovao ho Anao aho; Amin'ny valiha tory folo no hankalazako Anao, 10 Izay manome famonjena ho an'ireo mpanjaka, Sady mamonjy an'i Davida mpanompony tsy ho voan'ny sabatra mandratra. 11 Afaho aho, ka vonjeo amin'ny tanan'ny hafa firenena, Izay miteny zava-poana amin'ny vavany, Ary ny tànany ankavanana dia tanana ankavanana mamitaka;Miantsoa fanafahana avy amin’ ny Tompo
Salamo 144.6-11
Misy ady sarotra atrehan’ny mpanao salamo eto ary rehefa miady izany dia tsy maintsy manantena fandresena hatrany. Ny hery na ny paikady hahafahana mandresy no tsy maintsy apetraka tsara. Ny mpanao Salamo àry dia:
1-Niandrandra ny fanampian’ Andriamanitra
Hasehony sy haverina indroa ny zava-tsarotra hatrehany : « afaho aho ka vonjeo amin’ny tànan’ny fahavalo ». Milaza izany fa manankery ny fahavalony ka tsy azo tsinotsinoavina fotsiny. Ny fanehoana ny tànana ankavanana mamitaka eto dia filazana fa tena mamotika mihitsy izy fa tsy hisomonga fotsiny, raha tokony ho fanampiana sy fiarovana no azo avy amin’ny tànana ankavanana (jereo Isa. 41.10). Tsy mihevi-tena ho inona ny mpanao salamo hahatohitra izany ka miandrandra indrindra ny fanamian’ Andriamanitra miantso ny mpamaky koa izy hanao tahaka azy.
2-Midera an’ Andriamanitra
Toe-javatra fanao sy mivelatra ao amin’ny Salamo ary ampianarin’ny mpanao salamo ny mpamaky indrindra ny fiderana an’ Andriamanitra. Raha ny marina, ny sehatra misy eto dia ao anaty ady kanefa hasehon’ny mpanao salamo fa tsy ny fisian’ny ady akory no ilazana hoe: sahirana be, dia tsy hanam-potoana hiresahana sy hiderana an’Andriamanitra. Ny mifanohitra amin’izany aza no hatao, tena midera an’Andriamanitra amin’ny fotoana rehetra ka mino, fa io Andriamanitra io dia mahafantatra izay tokony hanampiana izay rehetra matoky Azy. Mitaona antsika hametraka ny fiainana amin’izany na inona na inona mitranga.
Fanontaniana:
Birao Sekoly Alahady FOIBE FJKM