Miandry ny Tompo ny vavolombelona mino
Mofonaina anio: Alahady, faha 05 Novambra 2017
Miandry ny Tompo ny vavolombelona mino
Salamo 33.18-22
18 Indro, ny mason'i Jehovah mitsinjo izay matahotra Azy, dia izay manantena ny famindram-pony, 19 mba hanafaka ny fanahiny amin'ny fahafatesana, sy hamelona azy, raha misy mosary. 20 Ny fanahintsika miandry an'i Jehovah; famonjena antsika sy ampingantsika Izy. 21 Fa Izy no ifalian'ny fontsika, satria ny anarany masina no itokiantsika. 22 Jehovah ô, aoka ny famindram-ponao hitoetra aminay araka ny anantenanay Anao.
Miandry ny Tompo ny vavolombelona mino
Salamo 33.18-22
Hobio ny Tompo
1-Mamonjy izay matahotra Azy Izy (and18-19)
Miatomboka amin’ny fijeren’ Andriamanitra ny olona izay mahatoky Azy ny famonjeny . Mitohy amin’ny fanaovany hetsi-panafahana izany ho fanatanterahana ny famonjena .Midika izany fa mijery akaiky ary tsy miala amin’ny olona izay miandrandra ny famonjeny sy matoky ny fitiavany ny mason’ny Tompo . Izany indrindra no nanirahany an’i Jesoa hiara-monina amintsika sy ho faty teo amin’ny hazo fijaliana ho famonjena antsika amin’ny fahafatesana tambin’ny ota . Noho izany dia:
2-Fahendrena ny miandry ny famonjeny (and 20-22)
Mitaona ny manodidina azy ny mpanao salamo mba hiandry ny famonjen’ny Tompo mandrakariva . Tsy misy afa-tsy ny Tompo no azo antoka hitondra famonjena noho ny famindrampony. Nasehony tao amin’i Jesoa ny maha- Mpamonjy tokana Azy. Izy irery ihany no nanaiky ho faty hisolo heloka ny maro mba ho famonjena izao tontolo izao . Na inona na inona hitranga dia fahendrena ny miandry ny famonjen’ Andriamanitra ho an’ny mpino satria efa nafoiny ho famonjena ho antsika ny zanany lahitokana .
Fanontaniana :
Birao Sekoly Alahady FOIBE FJKM