Mialà amin’ny fanaon-drazana
Mofonaina anio: Alakamisy, faha 05 Martsa 2020
ZAKARIA 1.1-6
ZAKARIA 1.1-6
1 [Fitarihan-teny] Tamin'ny volana fahavalo tamin'ny taona faharoa nanjakan'i Dariosa no nahatongavan'ny tenin'i Jehovah tamin'i Zakaria mpaminany, zanak'i Berekia, zanak'Ido, nanao hoe: 2 Tezitra indrindra tamin'ny razanareo Jehovah. 3 Koa lazao aminy hoe: Izao no lazain'i Jehovah, Tompon'ny maro: Miverena amiko ianareo, hoy Jehovah, Tompon'ny maro, dia mba hiverina ho aminareo kosa Aho, hoy Jehovah, Tompon'ny maro. 4 Aza mba toy ny razanareo, izay nantsoin'ny mpaminany fahiny hoe: Izao no lazain'i Jehovah, Tompon'ny maro: Mialà amin'ny lalanareo ratsy ianareo sy amin'ny ratsy fanaonareo; nefa tsy nitandrina izy, na nihaino Ahy, hoy Jehovah. 5 Ny razanareo - aiza moa ireny izao ? Ary ny mpaminany - moa velona mandrakizay va ireny? 6 Fa ny teniko sy ny didiko, izay nandidiako ny mpaminany mpanompoko, tsy nahatratra ny razanareo va izany? Ary izy nitodika ka nanao hoe: Araka izay nosainin'i Jehovah, Tompon'ny maro, hatao amintsika, araka ny alehantsika sy ny ataontsika, dia araka izany no nataony tamintsika.Mialà amin’ny fanaon-drazana
Taranaka vaovao no nitenenan’i Zakaria . Tsy ilay taranaka maditra teo aloha fa taranaka vaovao.Tsy izay nataon’ny teo aloha tokoa dia ho mahasoa avokoa .Misy zavatra tsy maintsy ialana tamin’izay nataon-drazana satria:
1-Mahatezitra an’Andriamanitra izany (and2,4)
Izao fahatezeran’Andriamanitra tamin’ny razan’ny razan’ireto taranaka vaovao ireto izao dia noho izy ireo tsy nety niala tamin’ny ratsy .Ray aman-dreny tsy mba faka tahaka amin’ny fanompoana an’ Andriamanitra , amin’ny fifandraisana amin’Andriamanitra . Miantefa amintsika taranaka ankehitriny koa izany hafatra izany .Aza mba toy ireo Ray amandrenintsika , na ireo zokintsika izay nantsoin’ny Filazantsara , nantsoin’ireo mpanompon’ Andriamanitra hiala amin’ny ratsy ka hiverina amin’Andriamanitra , kanefa nanao ho mafy hatoka , tsy azo notenenina. Taranaka vaovao isika , mitaky fomba fiaina sy fisainana vaovao amintsika koa izany .
2-Mamaly ny olona araka ny asany ny Tompo (and6)
« araka ny alehantsika sy ny ataontsika , dia araka izany no nataony tamintsika« .Anisan’ny zavatra iray izay hahafantarana an’Andriamanitra dia Izy mitsara ny olona araka ny asany . Raha manao izay tsara ny olona dia mitahy ny Tompo , rehefa manao izay tsy mifanaraka amin’ny sitrapon’ny Tompo mba tsy ho toy izay nahazo ireo razana fahiny koa no mbola hahazo antsika taranaka vaovao . Tena Andriamanitry ny famindrampo tokoa ny Tompo kanefa mamaly ny olony araka ny asany Izy.
Fanontaniana:
Inona amin’ireo fanaon-drazana no tsy maintsy ialana mba hahafahana mifandray tsara amin’Andriamanitra?
Sampana Sekoly Alahady FOIBE FJKM