Manolotra ny fiainany ny Tompo
Mofonaina anio: Alahady, faha 22 Aprily 2018
Manolotra ny fiainany ny Tompo
Amosa 5.4-7
4 Fa izao no lazain'i Jehovah amin'ny taranak'Isiraely; Tadiavo Aho, dia ho velona ianareo; 5 Fa aza mitady an'i Betela, na mankany Gilgala, ary aza mandroso ho any Beri-sheba; Fa ho babo tokoa Gilgala, ary Betela dia ho tonga tsinontsinona. 6 Mitadiava an'i Jehovah, dia ho velona ianareo; Fandrao hilatsaka toy ny afo mandevona amin'ny taranak'i Josefa Izy, ary Betela tsy hanana izay hahafaty ny afo, 7 Dia ianareo izay mamadika ny rariny ho zava-mahafaty ary mampiongana ny fahamarinana ho eo amin'ny tany.Manolotra ny fiainany ny Tompo
Amosa 5.4-7
Izay te-hahazo fiainana sy fahavelomana
1-Ny fombafombam-pivavahana fotsiny
Mila averina amin’ny fahitsiana ny fanompoana hatao ao Betela sy Gilgala , renivohitry ny fivavahan’ireo Zanak’ Israely . Tsy sitrak’Andriamanitra mihitsy mantsy ny fivoriana haroharoana faharatsiana (and21-22). Miankina tanteraka amin’ny fiverenana amin’ Andriamanitra ny fanasitranana ny tany voafidin’ Andriamanitra . Tsy miankina amin’ny toerana maha-velona sy akaiky an’ Andriamanitra, fa ny toe-po entina mitady Azy marina. Andriamanitra tsy voafaritry ny toerana mantsy Izy , fa Mpahary ambonin’izao rehetra izao.
2-Katsaho ny rariny sy ny marina
Vanimpotoana nanjakan’ny tsy rariny sy ny tsy fahamarinana ny andron’i Amosa mpaminany . Nanjaka ny tsindry hazo lena , ny kely tsy mba mamindro ary ny tsindrio fa lavo sy izay toy izany (and11,12). Antony lehibe nandringanan’ Andriamanitra ny vahoaka izany . Koa izany no iantsoana azy ireo hiala amin’izany . Andriamanitry ny fahamarinana ny Andriamanitry ny Baiboly. Koa miantso miantso ny mpanara-dia azy hikatsaka izany ho fototry ny fahavelomana marina tokoa.Amin’izao fotoanan’ny tsy fahamarinana izao dia miantso ny zanaky ny fiangonana manana andraikitra rehetra eto amin’ny firenena hampanjaka marina ny rariny sy ny hitsiny .
Fanontaniana:
Birao Sekoly Alahady FOIBE FJKM