Manolotra ny fiainany ny Tompo
Mofonaina anio: Alarobia, faha 04 Aprily 2018
Manolotra ny fiainany ny Tompo
Salamo 34.11-22
11 Avia, anaka, mihainoa ahy; ny fahatahorana an'i Jehovah no hampianariko anareo. 12 Na iza na iza ianao no maniry fiainana ka tia andro maro hahitana ny soa, 13 Dia arovy ny lelanao amin'ny ratsy ary ny molotrao mba tsy hiteny fitaka. 14 Halaviro ny ratsy, manaova soa; mitadiava fihavanana, ka araho izany. 15 Ny mason'i Jehovah dia mitsinjo ny marina, ary ny sofiny mihaino ny fitarainany. 16 Ny tavan'i Jehovah tezitra amin'ny mpanao ratsy kosa, mba hofongorany tsy ho eo amin'ny tany ny fahatsiarovana azy. 17 Mitaraina ny marina, ary mihaino azy Jehovah ka mamonjy azy amin'ny fahoriany rehetra. 18 Akaikin'izay manana fo mangorakoraka Jehovah, ary mamonjy izay torororo fanahy. 19 Maro ny fahorian'ny marina; nefa Jehovah manafaka azy amin'izany rehetra izany. 20 Miaro ny taolany rehetra izy; tsy hisy ho tapaka ireny na dia iray akory aza. 21 Hahafaty ny ratsy fanahy ny fahoriana; ary ny mankahala ny olo-marina hohelohina. 22 Fa Jehovah manavotra ny fanahin'ny mpanompony, ka tsy mba hisy hohelohina izay rehetra mialoka aminy.Manolotra ny fiainany ny Tompo
Salamo 34.11-22
Mandraisa fananarana avy amin’ny Tompo
Toy ny Ray be fitiavana mananatra ny zanany Andriamanitra ka manoro làlana antsika mba hahazoantsika miaina finaritra .
1-Fehezo ny vava (and13)
Halan’ Andriamanitra ny lela miteny ratsy ny namany sy ny molotra miteny fitaka (Mat 5.22). mahaiza mandanjalanja ny teny aloaky ny vava mba tsy hitondra fanafitohinana ho an’ny hafa (Kol 4.6) .
2-Mitadiava fihavanana (and14)
Ny fanaovantsoa amin’ny mpiara-belona no mahatsara fihavanana . Alaviro mandrakariva ny fomba sy toetra tsy hanisy ratsy ny mpiara- belona , fa aoka samy halemy fanahy amin’ny namany avy . Raha azo atao dia ataovy izay hihavanana amin’ny olona rehetra , indrindra fa ny mpianakavin’ny finoana (Rom 12.18).
3-Manaova ny marina
Ny olona mitandrina sy mankato ny Tenin’ Andriamanitra no ambara ho olo-marina araka ny Soratra masina . Maro ny tombotsoa aterak’izany voatanisa eto : tsinjovin’ Andriamanitra izy , henoin’ Andriamanitra ny fitarainany , mamonjy azy amin’ny fahoriany Izy , mahazo fiarovana avy amin’ Andriamanitra izy ka tsy mba hohelohina .
Fanontaniana:
Inona no vato misakana anao tsy hahafahanao mihavana amin’ny olona rehetra ?
Birao Sekoly Alahady FOIBE FJKM