Manaiky ny ho vavolombelon’ny Tompo ny irany.
Mofonaina anio: Alakamisy, faha 20 Jolay 2017
Manaiky ny ho vavolombelon'ny Tompo ny irany.
1 Petera 2.18-25
18 Hianareo mpanompo, maneke ny tomponareo amin'ny fahatahorana rehetra, tsy ny tsara sy ny malemy fanahy ihany, fa ny saro-po koa. 19 Fa izao no ankasitrahana: raha misy olona mitondra alahelo ka mandefitra ny tsy marina noho ny fieritreretana ny amin'Andriamanitra. 20 Fa inona no laza, raha tàhiny kapohina noho ny fahadisoana ianareo ka mandefitra amin'izany? Fa raha tàhiny manao soa kosa ianareo ka mitondra fahoriana sy mandefitra, dia izany no sitrak'Andriamanitra. 21 Fa ho amin'izany no niantsoana anareo; fa Kristy aza efa nijaly hamonjy anareo ka namela fianarana ho anareo, mba hanarahanareo ny diany; 22 "Izay tsy nanota akory, sady tsy nisy fitaka teo am-bavany" (Isa. 53.9); 23 raha notevatevaina Izy, dia tsy mba nanevateva; raha nijaly, dia tsy nandrahona, fa nanolotra ny adiny* ho amin'ny Mpitsara marina; [* Na: ny tenany] 24 ary Izy nitondra ny fahotantsika (Isa. 53. 12) tamin'ny tenany teo ambonin'ny hazo, mba ho faty ny amin'ny ota isika, fa ho velona ny amin'ny fahamarinana; ary "ny dian-kapoka taminy no nahasitranana anareo" (Isa. 53.5). 25 Fa efa nania toy ny ondry ianareo (Isa. 53.6), nefa ankehitriny dia efa niverina ho amin'ny Mpiandry sy Mpitandrina* ny fanahinareo.[* Gr. Episkopo]Manaiky ny ho vavolombelon’ny Tompo ny irany.
1 Petera 2.18-25
Manahafa an’i Jesoa Kristy
1-Iraka manaiky ny Tompony tahaka Azy
Manainga ny mpino ny Soratra masina eto mba hanaiky sy hananana fahatahorana ny mpampiasa azy na ny lehibeny . Tsy hanavahana na iza na iza izany fanekena sy fankatoavana izany izany . Tsy fanekena sy fahatahorana olona loatra anefa no antony fa ho fanahafana an’i Jesoa . Nanaiky ho iraka Izy ka tsy nanam-pandavana an’ Andriamanitra izay naniraka Azy na dia niafara tamin’ny fahafatesana aza izany fankatoavana sy fatahorana an’ Andriamanitra rainy izany . Amin’ny atao sy ampanaovina rehetra dia raiso ho toy ny iraka hampanaovin’ny Tompo ny asa sy ny andraikitra manandrify ka mijoroa ho iraka vavolombelon’ny Tompo amin’ny fanekena sy ny fahatahorana .
2- Iraka miaritra fahoriana tahaka Azy
Rehefa nanaiky ho iraka hitondra famonjena ho an’izao tontolo izao i Jesoa dia naka ny toeran’ny mpanompo . Niaritra ny fampahoriana sy ny fanenjehana natao taminy Izy .Nandefitra ny tsy rariny koa aza mba hahatanteraka ny iraka nampanaovin’ny Ray Azy . Afaka ny hanahaka an’i Jesoa koa isika irany eo amin’ny fiaretam-pahoriana . Mety misy ny mpampiasa izay mampitondra alahelo sy fahoriana . Maro ny mpiasa miaritra ny tsy rariny sy ny tsindry hazo lena ataon’ny mpampiasa na ny lehibe . Tsarovy anefa fa izay miara-miaritra amin’ny Tompo dia tsy maintsy hiara-mandresy Aminy koa.
Fanontaniana:
Birao Sekoly Alahady FOIBE FJKM