Manaiky ho vavolombelon’ny Tompo ny irany
Mofonaina anio: Alakamisy, faha 13 Jolay 2017
Manaiky ho vavolombelon'ny Tompo ny irany
1 Samoela 24.1-8
1 [Ny tsy netezan'i Davida hahafaty an'i Saoly, na dia azony tao an-johy aza] Ary Davida niakatra niala teo ka nitoetra tao amin'ny batery fiarovana tany En-jedy. 2 Ary rehefa niverina avy nanenjika ny Filistina Saoly, dia nisy nanambara taminy hoe; Indro, Davida any an-efitr'i En-jedy. 3 Ary Saoly naka telo arivo lahy voafantina tamin'ny Isiraely rehetra ka lasa nitady an'i Davida sy ny olony tany amin'ny vatolampin'ny osi-dia. 4 Ary tonga teo amin'ny valan'ondry tamoron-dalana izay nisy zohy izy, ka niditra tao Saoly mba hiavela; nefa Davida sy ny olony efa nipetraka tao anatin'ny zohy. 5 Ary hoy ny olon'i Davida taminy: Izao no andro nolazain'i Jehovah taminao hoe: Indro, hatolotro eo an-tananao ny fahavalonao hataonao araka izay sitrakao. Dia nitsangana Davida ka nitsaitsaika nanapaka ny sisin'ny kapôtin'i Saoly. 6 Nefa nony efa vita izany, dia namely an'i Davida ny eritreriny noho ny nanapahany ny sisin'ny kapôtin'i Saoly, 7 ka hoy izy tamin'ny olony: Sanatria amiko eo anatrehan'i Jehovah, raha hanao izany zavatra izany amin'ny tompoko izay voahosotr'i Jehovah ka haninjitra ny tanako aminy, fa voahosotr'i Jehovah izy. 8 Dia nampijanona ny mpanompony tamin'izany teny izany Davida ka tsy namela azy hitsangana hamely an'i Saoly. Ary Saoly nitsangana ka niala tao an-johy, dia nandeha tamin'izay nalehany.Manaiky ho vavolombelon’ny Tompo ny irany
1 Samoela 24.1-8
Mijoroa ho vavolombelon’ny Tompo
Nentin’ny fialonana Saoly ka nitady izay fomba rehetra hamonoana an’i Davida . Tena nirotsaka ho fahavalo mihitsy izay tamin’izany . Ny fihetsik’i Davida manoloana izany no fianarana ho antsika :
1-Aza maninji-tànana amin’ny olom-boahosotr’i Jehovah (and7)
Davida dia nanome lanja manokana ny maha-olom-boahosotra an’i Saoly , na inona na inona fahadisoana sy hadalany . Nampirisika azy ny mpanara-dia taminy mba hamelezany azy , saingy tsy nety izy . Fa hoy izy :« sanatria amiko …fa voahosotr’i Jehovah izy « (and7). Fianarana ho antsika fiangonana izany manoloana izay heverintsika ho fahalemena sy fahadisoan’ny mpitondra sy ny olom-boahosotry ny Tompo . Tsy anjarantsika ny manafay sy mikapoka ireny . Avelao ny Tompo izay nanosotra azy no hahalala ny aminy sy izay itondrany azy . Tsy mety amintsika ny mikasi-tànana ny mpanompon’ Andriamanitra . Izany no fijoroana ho vavolombelon’ny Tompo .
2-Tadiavo izay tsy hisian’ny fifamonoana (and8)
Sady tsy nikasi-tànana an’i Saoly Davida no nanakana ireo mpiara-dia taminy mba tsy hamely azy . Nifofo ny ain’i Davida anefa i Saoly , fa i Davida kosa niaro ny ain’i Saoly . Tsy azo atao ny mitazam-potsiny manoloana ny valifaty sy ny fifamonoana . Anjarantsika ny misakana sy mandresy lahatra ny olona tsy ho tafiditra amin’izany . Ny tena vavolombelon’ny Tompo dia mandray andraikitra ka misakana izay rehetra mety hiteraka ady sy fifadirana mbamin’ny herisetra rehetra , na inona na inona antony . Avelao ny Tompo no hiady fa isika kosa hangina .
Fanontaniana :
Birao Sekoly Alahady FOIBE FJKM