Mahatoky hatramin’ny fahafatesana ny mino
Mofonaina anio: Asabotsy, faha 08 Aogositra 2020
MARKA 13.5-13
MARKA 13.5-13
5 Ary Jesosy nilaza taminy hoe: Mitandrema, fandrao hisy hamitaka anareo. 6 Fa maro no ho avy amin'ny anarako hanao hoe: Izaho no Izy, ka maro no ho voafitany. 7 Ary raha mandre ady sy filazana ady ianareo, dia aza matahotra; tsy maintsy hisy izany, nefa tsy mbola tonga ny farany. 8 Fa hisy firenena hitsangana hamely firenena, ary hisy fanjakana hitsangana hamely fanjakana; ary hisy horohorontany any amin'ny tany samy hafa, sady hisy mosary; izany no fiandohan'ny fahoriana*.[*Gr. faharariam-piterahana] 9 Fa mitandrema ianareo, fa hatolotra amin'ny Synedriona sy hokapohina ao amin'ny synagoga ary hitsangana eo anatrehan'ny mpanapaka sy ny mpanjaka noho ny amiko ianareo ho vavolombelona aminy. 10 Ary ny firenena rehetra tsy maintsy hitoriana ny filazantsara aloha. 11 Koa raha mitondra anareo hatolotra izy, dia aza manahy rahateo izay holazainareo; fa izay teny homena anareo'amin'izany ora izany no holazainareo; fa tsy ianareo no hiteny, fa ny Fanahy Masina. 12 Ary ny rahalahy hanolotra ny rahalahiny ho amin'ny fahafatesana, ary ny ray hanolotra ny zanany; ary ny zanaka hitsangana hanohitra ny rainy aman-dreniny ka hahafaty azy. 13 Ary ho halan'ny olona rehetra ianareo noho ny anarako: fa izay maharitra hatramin'ny farany no hovonjena.Mahatoky hatramin’ny fahafatesana ny mino
Asain’ny Tompo amin’ny mpanara-dia azy eto . Voalaza fa hisy loza be hihatra amin’izao tontolo izao , toy ny fahapotehana sy faharavana , fahafatesana ary indrindra ny fanenjehana ny mpino . Manoloana izany dia tsy mampifendrofendro ny olona akory ny Tompo na sanatria mampatahotra , fa milaza mialoha kosa hoe : tsy maintsy hisy izany , ka tokony hiomanana . Ilaina àry ny :
1-Mitandrina manoloana ny mpamitaka
Mampahafantatra ny olony ny Tompo eto fa hisy ny lozabe mahatsiravina hihatra amin’ny tany , ary tsy ho afaka amin’izany akory ny olon’ Andriamanitra . Rehefa hisy àry izany dia ho avy ny karazan’olona mpamitaka na mpandresy lahatra na mpitaona ny olona ho amin’ny làlan-diso , ka hanambara amin’ny olona izao atsanga tsy aman’orana rehetra izao . Hitaona ny olona hanaraka azy izy ireny amin’izany , ary eo indrindra no itenenan’ny Tompo hoe : “Mitandrema fandrao hisy hamitaka anareo” amin’ireny mpamitaka samihafa ireny . Tandremo fa ny hampiala amin’ny fanarahan-dia ny Tompo no tadiaviny .
2-Mitandrina manoloana ny fanenjehana
Ankilan’izany , misy koa ny fanenjehana ny kristiana ary maneho amin’ny endrika maro samihafa izany . Raha ny marina dia tsy vao eto no misy filazana fanenjehana ny kristiana ary I Jesoa Kristy mihitsy no lohalaharana sy enjehina amin’izany . Ampihorohoroana sy enjehina ny kristiana mba hahatonga azy ireny handà ny fivavahany . Koa dia mampitandrina sy mampiomana antsika amin’izany ny Tompo .
Fanontaniana :
Tokony hatahotra sy hitsoaka ve ny mpino manoloana ny fanenjehana sy ny lozabe ? Inona no hatao ?
Sampana Sekoly Alahady FOIBE FJKM