Mahatoky hatramin’ny fahafatesana
Mofonaina anio: Alarobia, faha 12 Aogositra 2020
2 Tantara 24,17 - 22
17 Ary rehefa maty Joiada, dia avy Ireo mpanapaka ny Joda ka niankohoka teo anatrehan'ny mpanjaka. Dia nihaino azy ny mpanjaka. 18 Ary nandao ny tranon'i Jehovah, Andriamanitry ny razany, ireo ka nanompo ny Aseraha sy ny sampy dia nisy fahatezerana nihatra tamin'ny Joda sy Jerosalema noho ny fahadisoany. 19 Ary naniraka mpaminany tany aminy Izy hampiverina azy amin'i Jehovah; dia nananatra azy mafy ireo, nefa tsy nety nihaino izy. 20 Ary Zakaria, zanak'i Joiada mpisorona, notsindrian'ny Fanahin'Andriamanitra, dia nitsangana teo amin'ny avoavo teo anatrehan'ny vahoaka izy ka nanao taminy hoe: Izao no lazain'Andriamanitra: Nahoana ianareo no mandika ny didin'i Jehovah ka tsy mahita fanambinana? Satria efa nahafoy an'i Jehovah ianareo, dia nahafoy anareo kosa Izy. 21 Dia nanao teti-dratsy ireo ka nitora-bato azy teo amin'ny kianjan'ny tranon'i Jehovah araka ny tenin'ny mpanjaka. 22 Toy izany no tsy nahatsiarovan'i Joasy mpanjaka ny soa nataon'i Joiada rainy taminy, fa namono ny zanany izy. Ary nony efa ho faty Zakaria, dia niteny hoe: Jehovah anie hijery sy hamaly izao.Mahatoky hatramin’ny fahafatesana
1-Satria efa nandray ny Fanahin’Andriamanitra
Taorian’ny nahafatesan’i Joiada no niatombohan’ny vanim-potoana ny tsy fankatoavan’ny Jiosy izay anisan’ny mpanjaka tao amin’ny fanjakan’ny Joda ( taona 843-803) . Tafaverina teo amin’ny tany sy ny fanjakana ny fanompoantsampy . Nandefa mpaminany hampitandrina azy ireo Andriamanitra , kanefa tsy nohenoiny . Notsindrian’ ny Fanahin’Andriamanitra i Zakaria zanak’ i Joiada mba hitondra hafatra ho azy , nefa dia niafara tamin’n y fahafatesana (24.21) . Tazana teo amin’ny fiainan’i Jesoa Kristy koa izany tamin’ny fandalovany teto an-tany . Ho anao mahatoky noho ny amin’ny Tompo , mijoroa hatrany fa mety hiharan’izany koa ianao mpino .
2-Sahy miteny
“Efa nahafoy an’I Jehovah ianareo dia nahafoy anareo koa Izy “ (24.20). Ny fandikana ny didin’I Jehovah teo amin’izay natao no nahatonga an’I Zakaria niteny . Andriamanitra dia mahafoy ho an’izay mandika ny didiny tahaka izay voalaza eto . Mila fahasahiana ny miteny mba hanarahan’ny mpino ny sitrapon’ Andriamanitra . Ho anao mahatoky , sahia miteny , eny na dia hiafara amin’ny fahafatesana aza , toy izay nanjo an’I Jesoa Kristy .
Fanontaniana :
Ho anao izay efa nandray ny Tompo , moa manaiky hatramin’ny fahafatesana ve ianao ?
Sampana Sekoly Alahady FOIBE FJKM