Ilay Kristy Tompon’ny fanjakana
Mofonaina anio: Alahady, faha 11 Desambra 2022
APOKALYPSY 11.15-19
APOKALYPSY 11.15-19
15 [Ny nitsofana ny trompetra fahafito, sy ny nahatongavan'ny Joza fahatelo] Ary ny anjely fahafito nitsoka, dia nisy feo mafy tany an-danitra nanao hoe: Ny fanjakana amin'izao tontolo izao dia efa lasan'ny ny Tompontsika sy ny Kristiny; ary Izy no hanjaka mandrakizay mandrakizay. 16 Ary ny loholona* fatra amby roa-polo, izay mipetraka eo ambonin'ny seza fiandrianany eo anatrehan'Andriamanitra, dia niankohoka ka nivavaka tamin'Andriamanitra [* presbytera] 17 nanao hoe: Misaotra Anao izahay, Tompo Ô, Andriamanitra Tsitoha, Ilay ankehitriny sy taloha, Satria nasehonao ny herinao lehibe, ka efa manjaka Hianao. 18 Ary tezitra ny firenena maro, ary tonga ny fahatezeranao Sy ny fotoana hitsarana ny maty, sy hanomezana valim-pitia ny mpaminany mpanomponao sy ny olona masina ary izay matahotra ny anaranao, na kely na lehibe, ary mba hanimbanao izay manimba ny tany. 19 Ary novohana ny tempolin'Andriamanitra any an-danitra, ka hita ny fiaran'ny fanekeny teo anatin'ny tempoliny; ary nisy helatra sy feo sy kotrokorana sy horohorontany ary havandra vaventy.Ilay Kristy Tompon’ny fanjakana
1-Manjaka amin’izao tontolo izao
Notsofin’ny anjely fahafito ny trompetra , manambara ny fandresena ny faharatsiana rehetra izany .Resy ilay ratsy ka indro manjaka amin’izao tontolo izao Ilay Tompon’ny fanjakana , manjaka mandrakizay .Hamafisina eto ny voalaza ao amin’ny Mat 28.18 manao hoe: « efa nomena Ahy ny fajefana rehetra any an-danitra sy ety an-tany » Koa mba hahatonga ny ratsy tsy hanankery eo amin’ny fiainanao dia raiso sy ekeo ho Mpanjakanao i Jesoa Kristy.
2-Mpitsara marina
Tsy hoe: mitondra sy manapaka izao tontolo izao fotsiny ilay Tompon’ny fahefana fa mitondra sy mitsara ihany koa. Mitsara sy manameloka ilay ratsy nanimba ny tany Izy . Fa mifameno amin’izany kosa dia mitsara ka manome valimpitia ireo mpanompony izay niaritra tamin’ny zavatra rehetra,nitana ny finoana tamin’ny fanarahana Azy .Mifikira tsara amin’Ilay Tompon’ny fanjakana dia handray ny valimpitian’ny olom-boavonjy ianao.
3-Mitana ny fanekena
Rehefa novahana ny tempoly dia indro tao ny fiaran’ny fanekena dia ny fiaran’ny danekena maneho ny fanatrehan’Andriamanitra ny olony tany anefitra sady maneho Ilay Andriamanitra nanao fanekena tamin’ny olona . Ilay fandresen’Ilay Kristy Mpanjaka dia maneho fa mitana ny fanekena Andriamanira, mitoetra eo amin’ny olona Izy , ary tsy amela ho irery ny olona amin’ny fotoana rehetra .
Fanontaniana :
Inona no tokony hataonao mba hampanjaka an’i Kristy eo amin’ny fiainanao sy tokantranonao ?
Sampana Sekoly Alahady FOIBE FJKM