Ataovy tsara ny safidy
Mofonaina anio: Alatsinainy, faha 10 Aogositra 2020
DANIELA 3.13-18
DANIELA 3.13-18
13 Dia niteny tamin'ny fahavinirana sy ny fahatezerana Nebokadnezara, ka nasainy nalaina Sadraka sy Mesaka ary Abednego. Dia nentiny teo anatrehan'ny mpanjaka ireo lehilahy ireo. 14 Dia niteny Nebokadnezara ka nanao taminy hoe: Moa fanahy ninianareo va, ry Sadraka sy Mesaka sy Abednego, no tsy mba anompoanareo ny andriamanitro, na ivavahanareo amin'ny sariolona volamena izay natsangako? 15 Ankehitriny raha miomana ianareo amin'izay handrenesanareo ny fanenon'ny anjomara sy ny samboka sy ny valiha sy ny symponia sy ny Sobaba sy ny lokanga ary ny zava-maneno isan-karazany ka miankohoka sy mivavaka amin'ny sariolona izay nataoko, dia tsara izany; fa raha tsy mety mivavaka kosa ianareo, dia hatsipy miaraka amin'izay ho ao anatin'ny lafaoro misy afo mirehitra; ary iza moa izany Andriamanitra hahavonjy anareo amin'ny tanako izany? 16 Dia namaly Sadraka sy Mesaka ary Abednego ka nanao tamin'ny mpanjaka hoe: Ry Nebokadnezara, tsy misy antony tokony hamalianay anao akory ny amin'izany zavatra izany. 17 Indro, Andriamanitra Izay tompoinay dia mahavonjy anay amin'ny lafaoro misy afo mirehitra sady hamonjy anay amin'ny tananao, ry mpanjaka ô. 18 Ary na dia tsy izany aza, aoka ho fantatrao, ry mpanjaka ô, fa ny andriamanitrao dia tsy hotompoinay, ary ny sariolona volamena efa natsanganao dia tsy hivavahanay.Ataovy tsara ny safidy
1-Aza mivavaka amin’ny andriamanitra tsy izy
Nanamboatra andriamanitra i Nebokadnezara mpanjaka ary nandidy ny olona rehetra eo ambany fifehezany izy hivavaka amin’izany andriamanitra namboariny izany . Eto aloha dia mahavariana ny zava-misy , andriamanitra ve dia amboarina ? Kanefa dia izany no zava-misy eto . Ny tiany hahatongavana amin’izany dia izy no ho ambony indrindra satria izy no nanamboatra ilay andriamanitra . Tiany hanaiky izany ny olony rehetra . I Sadraka sy I Mesaka ary I Abednego kosa anefa , na dia lasa ho isan’ny olona feheziny aza dia nahasahy nanohitra ny teny na ny didin’ny mpanjaka , ka tsy hivavaka amin’ny andriamaniny satria efa manana izay ivavahany sy maharesy lahatra azy .
2-Mivavaka amin’Andiamanitra tokana sy marina
Nahatezitra mafy ilay mpanjaka izany fanapahankevitr’izy telo lahy izany . Nampiantso azy ireo izy ka niteny hoe : “Moa fanahy ninianareo va ny tsy hanompoanareo ny andriamanitro?” Mbola niala nenina tamin’izy telolahy ilay mpanjaka ary nilaza fa hamindra fo aminy raha nanapan-kevitra ny hivavaka amin’ny andriamaniny izy ireo . Mazava anefa ny valitenin’izy telolahy (and 16-18) . Efa vita ny safidin’izy telolahy ka na inona na inona fanerena azy ireo hivavaka amin’andriamanitra hafa sy izay ho sazy aterak’izany , dia tsia no navaliny , na dia tenin’ny mpanjaka aza izany , satria ny Andriamanitra inoany irery no tsy maintsy eken-teny sy atahorana ary ivavahan.
Fanontaniana :
Moa mahay sy mahasahy misafidy izay tokony ho Andriamanitra ivavahany ve ny kristiana na dia misy aza ny teritery tahaka izay voalaza eto ?
Sampana Sekoly Alahady FOIBE FJKM