Andriamanitra Mpanavotra…
Mofonaina anio: Alarobia, faha 11 Septambra 2024
Salamo 116. 1-11
Salamo 116. 1-11
1 [Fisaorana nataon'izay saiky maty, nefa novonjen'Andriamanitra] Izaho tia an'i Jehovah, satria efa nandre Ny feon'ny fifonako Izy. 2 Satria efa nanongilana ny sofiny tamiko Izy, Dia hiantso aho, raha mbola velona koa. 3 Nihodidina tamiko ny famatoran'ny fahafatesana, Ary nahazo ahy ny fahorian'ny fiainan-tsi-hita*; Nahita fahoriana sy alahelo aho. [Heb. Sheola] 4 Dia niantso ny anaran'i Jehovah hoe aho: Jehovah ô, mifona aminao aho, vonjeo ny fanahiko. 5 Mamindra fo sy marina Jehovah Eny, miantra Andriamanitsika. 6 Miaro ny kely saina Jehovah; Reraka aho, dia namonjy ahy Izy. 7 Miverena ho amin'ny fitsaharanao, ry fanahiko, Fa Jehovah efa nanisy soa anao, 8 Dia namonjy ny fanahiko tamin'ny fahafatesana Hianao Sy ny masoko tamin'ny ranomaso Ary ny tongotro tamin'ny fahatafintohinana. 9 Handeha eo anatrehan'i Jehovah Eo amin'ny tanin'ny velona aho. 10 Nino aho; hiteny tokoa aho*; Mahantra indrindra aho.[Na: fa hiteny aho] 11 Hoy izaho tamin'ny fahatairako; Mpandainga ny olona rehetra.Andriamanitra Mpanavotra…
1- Mpihaino vavaka
<< Izaho tia an’i Jehovah, satria efa nandre ny feon’ny fifonako Izy >>(and 1). Fijoroana vavolombelona no hita eto. Ambara fa ny Tompo dia manan-tsofina afaka mihaino ka mandre ny fifonanana sy ny fitarainana. Sambatra isika manana an’i Jesoa izay mipetraka eo ankavanan’ny Ray, mifona sy mivavaka ho antsika (Rom 8, 34). Mazotoa àry miresaka amin’ny Tompontsika. Aza misalasala, mijoroa ho vavolombelona amin’ny valim-bavaka maro izay omeny. Ambarao amin’ny Tompo ny fitiavanao.
2- Mpamindra fo sy Mpiantra.
« Mamindra fo sy miantra Jehovah »; Eny, miantra ny Andriamanintsika »(and 5). Be fitiavana ny Tompontsika. Rehefa manetry tena eo anatrehany isika ka miaiky heloka, mangataka famelana Aminy dia mamindra fo sy miantra Izy. Noho i Jesoa Kristy, Ilay avotra noho ny fahotantsika, dia mihaino sy mamindra fo ny Tompo. Aoka tsy hararaotina atao fahazarana io famelan- keloka atolony io. Mitondra fahafahana sy fahasitranana ny famindrampony.
3- Mpiaro sy Mpamonjy ary Mpampahery
« Reraka aho, dia namonjy ahy Izy » (and 6b): Tafalatsaka tao anatin’ny harerahana tanteraka ny mpanoratra eto. Efa nanakaiky ny fahafatesana. Tsy ampy niatrehana ny zava-misy intsony ny heriny samirery manoloana ny adin-tsaina sy adim-panahy nahazo azy. Soa ihany fa misy Tompo azo itarainana, Izay mahita sy mahalala ný zava-misy marina. Hoy ny Tompo hoe: « Antsoy Aho dia hovaliako lanao » (Jer33,3). Apetraho Aminy àry ny fanahiantsika rehetra.
Fanontaniana:
Inona avy ireo toetra mampiavaka ny Tompontsika?
Sampana Sekoly Alahady Foibe