Andriamanitra miaro ny Tompo
Mofonaina anio: Zoma, faha 27 Novambra 2020
Salamo 121,1 - 8
1 [Fahatokian'izay manana an'i Jehovah ho Mpiaro azy] Fihirana fiakarana*. Manopy ny masoko ho amin'ny tendrombohitra aho; Avy aiza ny famonjena ahy**? [**Na: Fihirana misy hevitra ambaratonga][**Na: Izay ihavian'ny famonjena ahy] 2 Ny famonjena ahy dia avy amin'i Jehovah, Mpanao ny lanitra sy ny tany. 3 Tsy mba havelany hangozohozo anie ny tongotrao; Tsy ho rendrehana anie ny Mpiaro anao. 4 Indro, tsy matory na rendrehana Ny Mpiaro ny Isiraely. 5 Jehovah no Mpiaro anao; Jehovah no fialofanao eo amin'ny an-kavananao. 6 Ny masoandro tsy mba hamely anao nony andro, Na ny volana nony alina. 7 Jehovah hiaro anao amin'ny ratsy rehetra; Eny, hiaro ny fanahinao Izy. 8 Jehovah hiaro anao, na mivoaka na miditra, Hatramin'izao ka ho mandrakizay.Andriamanitra miaro ny Tompo
Ny Salamo dia anisan’ny asa soratra maneho ny fifandraisana feno amin’Andriamanitra . Asa soratra fanehoam-pahatokiana an’Andriamanitra koa izy , toy izay hitantsika eto . Matoky an’Andriamanitra ny mpanao Salamo noho Izy :
1-Miaro amin’ny ratsy rehetra (and 7)
Tsy maharo tena isika olombelona amin’ny maha-olombelona antsika . Tsy manana hery ho enti-miaro tena , ary tena tsy mahay miaro tena mihitsy . Arovan’Andriamanitra amin’ny ratsy ny mino , amin’ny karazan-dratsy mety mpahazo ny olona , fa tena arovan’Andriamanitra amin’ilay ratsy sy amin’ny mpanao ratsy koa .
2-Miaro amin’ny fotoana rehetra (and 6,8)
Amin’ny alina dia arovan’ Andriamanitra ny mino . Amin’ny atoandro dia arovan’Andriamanitra ny mino . Amin’izao fotoana ankehitriny izao ka ho mandrakizay . Tsy misy fotoana ka hoe : tsy miaro ny mino Andriamanitra rehefa tsara fifandraisana Aminy isika . Hoy I Jesoa : “ Indro Izaho momba anareo mandrakariva ambara-pahatongan’ny fahataperan’izao tontolo izao “ (Mat 28.20)
3-Miaro amin’ny toerana rehetra (and 8)
Ny hoe : mivoaka sy miditra dia enti-milaza toerana roa misy ny mino . Ny mivoaka dia ho enti-milaza ny toeram-piasana na toerana ivelan’ny tokantrano . Ny miditra kosa dia ho enti-maneho ny ao an-tokantrano . Koa na aiza na aiza toerana misy ny mino dia miaro azy Andriamanitra . Amin’ny toerana rehetra tokoa mantsy Andriamanitra , araka izany dia miaro amin’ny toerana rehetra Izy .
Fanontaniana :
Inona avy no fantatrao amin’izay maha- izy Azy ny Tompo ?
Sampana Sekoly Alahady FOIBE FJKM