TATITRA / Fanolorana ireo MF sy ny Mpanantanteraka FOIBE
« Koa aza menatra ny ho vavolombelon’ny Tompontsika » (2 Tim 1.8a)
Misaotra an’ Andriamanitra lehibe , lohan’ny Fiangonana isika fa tontosa soamatsara ny Fanompoampivavahana fisaorana an’ Andriamanitra sy fanolorana ary fametrahana amin’ny andraikiny ireo Mpiandraikitra Foibe , fanolorana ny Birao mpanatanteraka eo anivon’ny FOIBE FJKM .
Izany dia natao ny Alahady 23 Oktobra 2016 , tamin’ny 2ora sy sasany , tao amin’ny FJKM Analakely
Nitarika ny fotoana : ny Mpitandrina ao amin’ny FJKM Analakely RAZAFIMAMONJY Dina .
Nitoriteny : ny Filohan’ny FJKM , ny Mpitandrina IRAKO ANDRIAMAHAZOSOA Ammi .
Nitarika ny fanolorana sy fametrahana : ny Mpitandrina RAKOTONIRINA Charles.
Nitari-bavaka sy namaky ny Teny avy ao amin’ny Soratra masina ireo Mpikambana Birao FOIBE , ny Mpitandrina SOJA Arthur, President Synodal Ambovombe Androy .
Nanafana ny fotoana : ny STK AFA FJKM Ambohinaorina .
Ireo Tomponandraikitra natolotra sy
napetraka teo amin’ny toerany :
-Sekretera Jeneraly : RADIMISAON Jonah , Mpitandrina
-Tonian’ny Departemantan’ny Fiangonana : RAKOTONDRAINY Jaona , Mpitandrina (President Synodal Mangoro Moramanga teo aloha )
-Tonian’ny Departemantan’ny Sekoly : RAKOTONDRANAIVO Domoina Andrianasolo (Talen’ny Sekoly FJKM Marovoay teo aloha )
-Tonian’ny Departemantan’ny Mpiasa sy ny Vola : Ramatoa ANDRIANIRINA Velosoa (Vadin’ny Mpitandrina FJKM Antarandolo Fianarantsoa )
Noraisin-tànana koa ny mpikambana ao amin’ny :
FIFAMPI notarihan’ny Filohany , ny Mpitandrina RAZAFINDRAMANITRA Nestor
FIFAFI notarihan’ny Filohany RAZARASOA Timoty , Mpitandrina .
ASA VAVOLOMBELONA :
-Fiarahabana ny solotenan’i Madagasikara , Ramatoa RALIBERA Mbolatiana no nibata ny loka voalohany tamin’ny fifaninanana iraisam-pirenena momba ny fanaovana tetikasa , niarahana tamin’ny ENTREPRENARIAT BIBLIQUE . Mikasika ny FIOMPIANA PAPELIKA no notohanany tamin’izany .
-Fanaovam-beloma an- dRamatoa HILDA ASIKULE , mpampianatra teny Anglisy tamin’ny sehatra samihafa teo anivon’ny FJKM . Niasa teto Madagasikara nandritra ny 10 taona izy , ary ny vadiny Japhet ASIKULE miasa eo anivon’ny SAF / FJKM dia mbola hanohy ny asany hatramin’ny volana Desambra .
TORITENY :
2 TANTARA 34.1-7
Antsoina ho mahatoky toa an’i Josia isika
1-Mahatoky amin’ny finoana :
Nitady an’ Andriamanitra i Josia . Endriky ny fahatokiana izany . Tsy nanara-davahana tamin’ny nataon’ireo teo aloha izy . Fiverenana mba ho Andriamanitra no ivon’izay rehetra atao . Josia nitondra fanavaozana teo amin’ny fiangonana sy ny firenena . Ampitahao amin’ny tantaran’i Zakaiosy .Tena nitady an’ Andriamanitra izy . Tsy maintsy niova , midina , manetry tena , mampandroso an’i Jesoa ao am-po. Zakaiosy dia mpanangona teo aloha , lasa mpanolotra .Efa lasa ny zavatra taloha fa tsy hoe : nihena ny zavatra teo aloha . Mila lehilahy sy vehivavy mahatoky amin’ny finoana satria nandray fiainam-baovao ny fiangonana .
2-Mahatoky amin’ny fanompoana :
Josia dia tia miasa . Tsy mijanona ho fiovam-po fa niasa nandrava ny sampy rehetra tany izy . Mila vonona hiasa fa tsy mila entanina , tsy malaina . Rehefa niasa izy dia nandrava , nokapainy , notorotoroiny , nomongomongoiny ny sampy . Tsy nahafinaritra ny olona izany zavatra nataon’i Josia izany . Tsy manao marimaritra iraisana . Aoka ho mpanompo mahatoky. Matio 15 . 13 : hongotana fa tsy safosafoina . Jesoa koa nandray kotopia , nanjera ny latabatry ny mpanakalo vola rehefa nahita ny zavatra tsy mety tao amin’ny Tempoly . Toy izany koa no iantsoan’ Andriamanitra antsika . Na ao anatin’ny fiangonana aza dia misy sampy samy hafa . Misy mbola mitan-droa ao am-piangonana .Mila miverina indray mieritreritra isika . Tsy voatery hahafaly ny olona akory izany . Ny sampy lehibe ankehitriny dia ny VOLA . Mahatsiravina ny fahefan’ny vola .Ravao ny tempolin-tsampy ato anatin’ny fiangonana .Tsy maintsy ravana ny herin’ny vola .Isan’ny sampy lehibe koa ny FILAN-DRATSY , ny fijangajangana , ny toaka … Tsy maintsy ravana avokoa izany .
3-Mahatoky amin’ny finoana sy ny fanompoana :
Misy amin’ireo efa nahavita asa lehibe no hametram-panontaniana amin’ny andro farany hoe : « tsy efa nanao asa lehibe tamin’ny anaranao va izahay ? » Ny hoe : mahatoky amin’ny finoana dia fiainana ao anaty , avy eo vao miseho ety ivelany . Raha tsy izany dia fihetsiketsehana mampidi-doza, fisandohana fotsiny ihany . Hoy i Jesoa tamin’ny :mpianany ao amin’ny JAONA 6.70 : « … Tsy Izaho va no nifidy anareo roa ambin’ny folo lahy , nefa ny iray aminareo aza dia devoly ? ». Jodasy koa nantsoina ho mpitahiry vola , nanana andraikitra , nanaiky ny fifdianana azy fa tsy nanaiky ilay NIFIDY Azy izy .Ary ianao , moa manaiky ilay nifidy anao ka manaiky Azy ho Tompo sy Mpamonjy anao ?
Farany , mamerina ny antso : VONTOSY FILAZANTSARA NY NOSY MADAGASIKARA. Ny fiangonana tsirairay no manomboka izany . Ataontsika henika ny Filazantsara i MADAGASIKARA , ary amin’ny taona 2118 dia mbola hitoetra ho kristiana hatrany ny Nosy Madagasikara .
An’ Andriamanitra irery ihany ny Voninahitra
Nangonin-dRamatoa Sahondra Rabelison
Afifab /site web