AN’NY TOMPO NY FAHEFANA
Mofonaina anio: Alahady, faha 01 Jona 2025
2 Tantara 25. 1-12
2 Tantara 25. 1-12
1 [Ny nanjakan'i Amazia] Dimy amby roa-polo taona Amazia, fony izy vao nanjaka, ary sivy amby roa-polo taona no nanjakany tany Jerosalema. Ary ny anaran-dreniny dia Joadana, avy any Jerosalema. 2 Ary nanao izay mahitsy eo imason'i Jehovah izy, nefa tsy dia tamin'ny fony rehetra. 3 Ary nony tafapetraka tsara tamin'ny fanjakany izy, dia novonoiny ireo mpanompony izay namono ny mpanjaka rainy. 4 Nefa ny zanak'ireo namono dia tsy mba novonoiny, fa nataony araka izay voasoratra ao amin'ny bokin'ny lalàna. dia ao amin'ny bokin'i Mosesy, izay nandidian'i Jehovah hoe: Ny ray tsy hatao maty amin'ny ataon'ny zanany, ary ny zanaka tsy hatao maty amin'ny ataon'ny rainy, fa samy ho faty amin'ny fahotany avy ny olona. 5 Ary novorin'i Amazia ny Joda, ka nalahany araka ny fianakaviany avy, dia araka ny mpifehy arivo sy ny mpifehy zato avy amin'ny Joda sy ny Benjamina rehetra: dia nisainy ny hatramin'ny roa-polo taona no ho miakatra, ka olona telo hetsy voafantina no hitany, izay azo nalefa hanafika sady nahatan-defona sy ampinga lehibe. 6 Ary nisy lehilahy mahery iray hetsy tamin'ny Isiraely nokaramainy talenta volafotsy zato. 7 Nefa nisy lehilahin'Andriamanitra tonga tao aminy ka nanao hoe: Ry mpanjaka, aza avela hanaraka anao ny miaramilan'ny Isiraely; fa tsy omban'i Jehovah ny Isiraely, dia ny taranak'i Efraima rehetra. 8 Fa mandehana ihany ianao, ka manaova, ary mahereza amin'ny ady; fa hataon'Andriamanitra lavo eo anoloan'ny fahavalo ianao; fa Andriamanitra no mahay mamonjy sy mampahalavo. 9 Fa hoy Amazia tamin'ilay lehilahin'Andriamanitra: Ka hataontsika ahoana ny amin'ny talenta zato nomeko ny miaramilan'ny Isiraely? Asy hoy ilay lehilahin'Andriamanitra taminy: Jehovah mahay manome anao mihoatra lavitra noho izany. 10 Dia navahan'i Amazia ireo miaramila tonga tao aminy avy tamin'ny Efraima ireo mba hody indray; ary nirehitra mafy ny fahatezeran'ireo tamin'ny Joda, dia lasa nody izy sady tezitra indrindra. 11 Ary Amazia nitombo hery, dia nitarika ny vahoakany ka nankany amin'ny Lohasahan-tsira, ary nahafaty iray alina tamin'ny taranak'i Seira izy. 12 Ary ny iray alina sisa nataon'ny taranak'i Joda sambo-belona, dia nentiny teo an-tampon'ny hantsam-bato ary navariny teo, ka montsamontsana izy rehetra.Ny 2Tantara 25 manontolo dia mirakitra ny tantaran’i Amazia mpanjaka tao Joda. Ny dikan’ny anarana hoe Amazia dia hoe « Mahery Jehovah », ary tena izany no mihasinkasina ao amin’ity toko ity. Azontsika tsoahina avy amin’izany àry fa:
1- Andriamanitra no Tompon’ny fotoana (and 1)
«Dimy amby roa-polo taona Amazia, fony izy vao nanjaka, ary sivy amby roa-polo taona no nanjakany tany Jerosalema… >> hoy ny fitantarana. Hitantsika eto fa vao manomboka ny tantara dia efa manomana sahady fa 29 taona no faharetan’ny fanjakan’i Amazia, midika izany fa Andriamanitra no tompon’ny fotoana fa tsy misy olombelona manana safidy na hikajy manokana ny fotoana, na ny hahavelomany izany, na ny hijanonany amin’ny andraikitra samihafa. Raha mbola omen’Andriamanita ny fotoana día araraoty hanaovana ny sitrapony; fa hoy i Jesoa: « Mandehana raha mbola manana ny mazava ianareo… » (Jao 12. 35b). Mitaona antsika hanetry tena izany satria hay tsy ananantsika fahefana ny fotoana!
2- Andriamanitra no Tompon’ny hery (and 11)
Milaza amintsika ny tantara hoe: << Ary Amazia nitombo hery… »; tsy hoe satria lalin-tsaina na matanjaka ara-batana akory anefa izy ka afaka nandresy ny Edomita, fa tolo-tsaina avy amin’Andriamanitra (and 7ss), ary fidiran’Andriamanitra an-tsehatra no anton’izao fandreseny izao. Kinanjo nihevi-tena ho mahery Amazia, ka sady nanompo sampy (and 14) no lasa nihaika ny Isiraely indray koa (and 17ss). Vokany, resy an’ady ary ny niafarany aza ny olony ihany no namono azy. Aoka tsy hihevi-tena ho zavatra, fa henoy sy ankatoavy ny Tenin’Andriamanitra!
Fanontaniana:
Andriamantira no Tompo, hatraiza ny fahatokianao Azy?
Sampana Sekoly Alahady Foibe