Ny Andriamanitra ivavahantsika
Mofonaina anio: Alahady, faha 20 Aprily 2025
(Sal 66,8-12 / Hira: 146 / Vavaka / Mofonaina / Vavaka / Hira:142)
Daniela 6. 26-29
26 Tamin'izany Dariosa mpanjaka dia nanoratra ho amin'ny fokom-pirenena sy ny firenena sy ny samy hafa fiteny rehetra izay monina ambonin'ny tany rehetra hoe: Hitombo anie ny fiadananareo. 27 Manao lalàna aho mba hangovitan'ny olona sy hatahorany eo anatrehan'Andriamanitr'i Daniela eran'ny fanjakako rehetra; fa Izy no Andriamanitra velona sady maharitra mandrakizay; ny fanjakany haharitra hatramin'ny farany. 28 Izy no mamonjy sy manafaka ary manao famantarana sy fahagagana any an-danitra sy et? an-tany, ary Izy no namonjy an'i Daniela ho afaka tamin'ny herin'ny liona. 29 Ary izany Daniela izany dia nambinina tamin'ny nanjakan'i Dariosa sy tamin'ny nanjakan'i Kyrosy Persiana.Ny Andriamanitra ivavahantsika
1- Andriamanitra velona
Natsipy tao an-davaky ny liona i Daniela noho ny fanohizany nandohalika sy nivavaka intelo isanandro teo anatrehan’Andriamanitra (and11). Nalahelo ny mpanjaka ary dia nirary azy hoe « Andriamanitrao Izay tompoinao mandrakariva anie hamonjy anao »(Dan 6.17). Nanontany ny mpanjaka nony maraina ny andro raha nahavonjy an’i Daniela ny Andriamanitra nivavahany (and 21). Namaly Daniela hoe: << Andriamanitro efa naniraka ny anjeliny ka nanakombona ny vavan’ny liona tsy handratra ahy » (and23). Faly ny mpanjaka, ary nanao fanambarana miezinezina fa Andriamanitra velona ny Andriamanitr’i Daniela (and 27). lanao koa dia ilaina mba hanambara fa velona Jesoa. Hainy ny manafaka anao amin’ny fandrika.
2- Mpamponjy sy mpanafaka
« Izy no mamonjy sy manafaka ary manao famantarana sy fahagagana » (and 28). Tsy takatry ny sain’olombelona ny fahalebiazan’ny Tompontsika. Amintsika mantsy, izay alatsaka ao an-davaky ny liona dia tsy maintsy maty; izay atsipy ao anaty lafaoro mahamay dia tsy maintsy kila forehitra; izay atelin’ny hazandrano any an-dranomasina dia tsy misy hevitra intsony; ary izay nodimandry dia tsy ho velona intsony. Manambara anefa ny Tompo hoe: « Ny fihevitro tsy fihevitrareo ary ny lalanareo kosa tsy mba lalako » (Isa55, 8). Aminy dia « miara-miasa hahasoa ny zava-drehetra » (Rom 8,28). Hainy ny manavotra sy hanafaka ny mpanompony. Jesoa no Mpamonjy sy mpanafaka antsika.
Fanontaniana
Inona avy ireo tranga efa nanafahan’ny Tompo anao?
Sampana Sekoly Alahady Foibe