Manetre tena fa zava-poana ny ezaka ataonao
Mofonaina anio: Asabotsy, faha 07 Desambra 2024
Mpitoriteny 2. 4-11
Mpitoriteny 2. 4-11
4 Nanao asa lehibe ho ahy aho, nanao trano, nanao tanim-boaloboka, 5 nanao tanimboly sy saha aho ka namboly hazo fihinam-boa samy hafa karazana tao; 6 nanao kamory aho handemana ny ala be zana-kazo; 7 nahazo ankizilahy sy ankizivavy aho sady nanana ompikely; ary nanana fananana be aho, dia omby sy ondry aman'osy mihoatra noho izay rehetra talohako teto Jerosalema. 8 Nihary volafotsy sy volamena koa aho ary fanaka tsara fananan'ny mpanjaka sy izay avy amin'ny tany samy hafa; ary nahazo mpihiralahy sy mpihiravavy aho mbamin'izay mahafinaritra ny zanak'olombelona, dia vady sy vaditsindrano betsaka*. [Na: fahafinaretan'ny zanak'olombelona be dia be] 9 Dia efa nisandratra mihoatra noho izay rehetra talohako teto Jerosalema aho; ary ny fahendreko anefa dia mbola tato amiko ihany. 10 Ary na inona na inona nirin'ny masoko dia tsy nisy narovako taminy; tsy nisakana ny foko tamin'izay mety ho fifaliana aho; fa nahazo hafaliana avy tamin'ny fisasarako rehetra ny foko; ary izany no anjarako avy tamin'ny fisasarako rehetra. 11 Kanefa nitodika aho nandinika ny asa rehetra nataon'ny tanako sy ny fisasarana izay nisasarako, ka, indreo, zava-poana sy misambo-drivotra* foana izany rehetra izany, fa tsy nisy nahasoa tat? ambanin'ny masoandro.[Na: Homan-drivotra]Manetre tena fa zava-poana ny ezaka ataonao
Zava-poana ny fiainana eto an-tany. Noho izany dia mahaiza manetry tena ka hibanjina ny any an-danitra.
1- Tsy mahasoa ny zavatry ny tany
Voatanisa eto ny ezaka rehetra nataony mba hananany fiainana miavaka: nanao trano, nanao tanimboaloboka, fambolena isan- karazany, fiompiana samihafa, nanangona harena sarobidy. Raha jerena amin’ny lafiny ara-toe-karena dia tsy nanan-java-mahory izy, feno ny filana maha olona rehetra, sady manana ny anjara- toerana maha izy azy tao anatin’ny fiaraha-monina. Saingy rehefa nandinika ny tena fiainana izy dia nahatsapa ka niteny hoe: «tsy nisy nahasoa taty ambany masoandro» (and.11). Mahaiza manetry tena, aza mifikitra loatra amin’ny zavatry ny tany fa tsy mahasoa izany, mora miova.
2- Banjino ny tena fiainana
<<Kanefa rehefa nitodika aho nandinika ny asako rehetra» izany hoe nijery tamin’ny antsipiriany, nijery akaiky tokoa, dia nandray fanapahan-kevitra fa tsy ny fikatsahana ny eto an-tany no tokony handaniana ny andro. Misy ny tena fiainana voaoman’ Andriamanitra ho an’ny olombelona mino sy manaiky Azy. Izany no tokony hironan’ny fo sy ny saina. Fanetren-tena, fanafoanana ny ezaka nataony tety an-tany fa fiezahana kosa ho amin’ny finoana sy fatokiana fa misy ny tena fiainana ao amin’Andriamanitra. Tsy azo ianteherana ny fiainana eto an-tany. Ao amin’Andriamanitra no tena harena sy fiainana maharitra, manetre tena mba hitoetra eo Aminy mandrakariva.
Fanontaniana:
Inona no toromarika omenao amin’ireo fatra-pifikitra amin’ny zavatry ny tany ka manadino an Andriamanitra?
Sampana Sekoly Alahady Foibe