Raha misy fikasàna ao anatinao!
Mofonaina anio: Alakamisy, faha 14 Novambra 2024
1 Korintiana 14.12-19
1 Korintiana 14.12-19
12 Ary toy izany ihany koa ianareo: raha fatra-paniry ny zava-panahy, dia izay hampandroso ny fiangonana* no tadiavo indrindra. [* Gr. eklesia] 13 Koa aoka izay miteny amin'ny fiteny tsy fantatra hangataka mba hahay mandika teny koa. 14 Fa raha mivavaka amin'ny fiteny tsy fantatra aho, dia ny fanahiko ihany no mivavaka, fa ny saiko kosa tsy mahavanona. 15 Ahoana ary no izy? Sady hivavaka am-panahy no hivavaka an-tsaina koa aho; sady hihira am-panahy no hihira an-tsaina koa aho. 16 Fa raha misaotra am-panahy fotsiny ihany ianao, hataon'izay tsy mahay ahoana no hanao Amena, raha misaotra ianao? satria tsy mahalala izay lazainao Izy. 17 Fa ianao dia misaotra tsara ihany, nefa ny hafa kosa tsy mba ampandrosoina. 18 Misaotra an'Andriamanitra aho fa miteny amin'ny fiteny tsy fantatra mihoatra noho ianareo rehetra aho; 19 nefa raha ao am-piangonana*, dia aleoko manao teny dimy fantatry ny saiko mba hampianarako ny sasany koa, toy izay hanao teny iray alina amin'ny fiteny tsy fantatra. [* Gr. eklesia]Raha misy fikasàna ao anatinao!
« Ary toy izany ihany koa ianareo: raha fatra-paniry ny zava-panahy, dia izay hampandroso ny fiangonana no tadiavo indrindra.» (and.12)
1. Fantaro izay antom-panaovana izany
Ny fanomezam-pahasoavana avy amin’ny Fanahy Masina no azo andikana ny teny hoe zava-panahy eto. Iza moa no tsy maniry hanana izany, eny tsy vitsy no mangataka izany isika. Fa inona no antony angatahantsika izany? inona no manosika antsika hanao izany? Sao sanatria mba ahazoantsika dera sy laza eo imason’ny olona? Tsarovy fa isika amin’izay ataontsika sy angatahintsika dia tsy ho antsika fa noho isika novonjen’Andriamanitra tamin’ny alalan’i Kristy Jesoa.
2. Izay mampandroso ihany no aoka atao
Ny atao hoe Fiangonana dia tsy ny vatan-trano ihany fa izay olona mino rehetra ao amin’izany. koa raha misy fikasana na fanaovana amin’izay ataontsika dia izay hampandroso ny fiangonana amin’ny finoana no aoka hotadiavina sy katsahintsika ka hananatsika be dia be. Fa voalaza fa zarazaraina ho samihafa ny fanomezam-pahasoavana, fa ireny dia natolotra indrindra ho fampandrosoana fa tsy hampiavaka sy ireharehantsika izay manana azy.
Fanontaniana:
Tanisao ireo fanomezam-pahasoavana mampandroso hitanao ao amin’ny fiangonana misy anao
Sampana Sekoly Alahady Foibe