Ny mahaloto ny olona
Mofonaina anio: Talata, faha 20 Aogositra 2024
Marka 7.14-23
Marka 7.14-23
14 Ary niantso ny vahoaka hankeo aminy indray Izy ka nanao taminy hoe: Mihainoa Ahy ianareo rehetra, ka mahafantara. 15 Fa tsy ny zavatra avy eo ivelany izay miditra ao anatin'ny olona no mahaloto azy; fa izay mivoaka avy ao anatin'ny olona no mahaloto azy*. [*Ampio hoe:] 16 [Raha misy manan-tsofina ho enti-mihaino, aoka izy hihaino] 17 Ary rehefa niala teo amin'ny vahoaka Izy ka niditra tao an-trano, dia nanontany Azy ny mpianany ny amin'izany fanoharana izany. 18 Ary hoy Izy taminy: Hay! ianareo koa aza mba tsy mahafantatra! Tsy fantatrareo va fa izay rehetra eo ivelan'ny olona ka miditra ao anatiny dia tsy mahaloto azy, 19 satria tsy miditra ao am-pony izany, fa ao an-kibony ihany, ka dia mivoaka ao amin'ny fivoahana; izany no nolazainy mba hahadio ny hanina rehetra. 20 Ary hoy Izy: Izay mivoaka avy ao amin'ny olona, dia izany no mahaloto azy. 21 Fa avy ao anatin'ny olona dia avy ao am-pony, no ivoahan'ny sain-dratsy, dia ny fijangajangana, ny halatra, ny vonoan-olona, ny fakam-badin'olona, 22 ny fieremana, ny lolom-po, ny fitaka, ny fijejojejoana, ny maso ratsy, ny fitenenan-dratsy*, ny avonavona, ny fahadalana:[*Gr. blasfemia; izahao Mat. 9. 3] 23 izany zava-dratsy rehetra izany no mivoaka avy ao anatin'ny olona ka mahaloto azy.Ny mahaloto ny olona
1- Tsy izay miditra ao anatin’ny olona
Niteraka olana teo amin’ny Fariseo sy ny mpianatr’i Jesoa, ny amin’ny fihinanan-kanina tamin’ny tanana tsy madio. Ahitsin’i Jesoa izany fiheveran-dison’ireo mpitarika jamba mpitondra fivavahana izany, izay namindra izany tao amin’ny vahoaka. Nihevitra mantsy izy ireo fa izay miditra ao amin’ny olona no mampaloto azy. Hamafisin’i Jesoa eto fa izay rehetra eo ivelan’ny olona ka miditra ao anatiny dia tsy mahaloto azy (and 18), fa ao amin’ny kibo ihany ka dia mivoaka ao amin’ny fivoahany (and 19). Avahan’i Jesoa tsara ny fo sy ny kibo eo amin’ny fanazavany, satria variana tamin’ny zavatra ivelambelany ny Loholona sy ny Fariseo. Tsy izay miditra ao amin’ny kibo akory dia mahaloto ny olona.
2- Fa izay mivoaka avy ao anatin’ny olona
Ny fo indray no resahana eto fa tsy ny kibo. Ny fo no mitahiry ireo karazan-javatra maloto toy ny sain-dratsy, fijangajangana, ny halatra, ny vonoan’ olona, niny fakam-badin’olona, ny fieremana, ny lolom-po, ny fitaka, ny fijejojejoana, ny maso ratsy, ny fitenenan-dratsy, ny avonavona, ny fahadalana… Ireny rehetra ireny dia avy ao anatin’ny fo ka mahaloto azy. Nambaran’i Jesoa izany mba tsy hahadiso hevitra ny mpihaino sy ny mpamaky. Koa izay manan-tsofina izay ho enti-mihaino, aoka izy hihaino.
Fanontaniana:
Inona avy ireo heverin’ny olona fa mahaloto ankoatra ny voalaza eto?
Sampana Sekoly Alahady Foibe