Izay mankalaza ny Mpamonjy…
Mofonaina anio: Alarobia, faha 06 Desambra 2023
Jaona 13:31-35
Jaona 13:31-35
31 Ary tamin'izay, nony efa nivoaka izy, dia hoy Jesosy: Ankehitriny dia efa ankalazaina ny Zanak'olona; ary Andriamanitra no ankalazaina eo aminy. 32 Ary Andriamanitra kosa hankalaza Azy amin'ny tenany; eny, hankalaza Azy miaraka amin'izay Izy. 33 Anaka, vetivety foana no sisa hitoerako eto aminareo. Hitady Ahy ianareo, ary araka ny voalazako tamin'ny Jiosy hoe: Izay alehako tsy azonareo haleha, dia toy izany koa no lazaiko aminareo ankehitriny. 34 Didy vaovao no omeko anareo, dia ny mba hifankatiavanareo; eny, aoka ho tahaka ny fitiavako anareo no mba hifankatiavanareo kosa. 35 Izany no hahafantaran'ny olona rehetra fa mpianatro ianareo, raha mifankatia.Izay mankalaza ny Mpamonjy…
Jesoa Kristy rehefa avy nanasa ny tongotry ny mpianatra dia niara- nisakafo tamin’izy ireo ary dia nanambara ny fisian’ny mpianatra izay hamadika Azy dia i Jodasy izany. Rehefa nandao io fiarahana io i Jodasy dia nanome toromarika ho an’ny tena mpianatra marina i Jesoa Mpamonjy.
1- Mihavao amin’ny toetra
Naningana tamin’ireo mpianatra nofidiana i Jodasy. Nivadika, namadika Ilay niantso sy nifidy azy, tsy nihavao tamin’ny toetrany. Manoloana izany dia nitaona ny mpianatra mba hihavao i Jesoa Kristy, hihavao mba ho mpianatra marina afaka mankalaza ny Mpamonjy. Andriamanitra Rainy dia mankalaza Azy hatrany amin’ny asa. Fa tarihina ihany koa ny olona akaiky an’i Jesoa Kristy, mahita ny asany, mahatsapa ny fitiavany dia tokony hankalaza Azy mandrakariva.
2-Mihavao amin’ny fifankatiavana
Niala tamin’ny fiombonana i Jodasy, niaina tamin’ny fitiavan-tena ka namadika Ilay Mpampianatra nifidy azy. Endriky ny fizaran’ny mpianatra ny fisian’ny anankiray mandao ny fiombonana noho ny fitiavan-tena. Mananatra sy mitaona ny mpianatra noho izany i Jesoa Kristy, mba ho fitandrovana ny fifankatiavana. Notiavin’i Jesoa Kristy tamin’ny fitiavana madio tsy mila tambiny izy ireo ka tokony hifankatia, izany no mampiavaka ny tena mpianany. Ny mpianatra mifankatia no afaka hankalaza ilay Mpamonjy azy eo amin’ny fiainana manontolo.
Fanontaniana:
Nahoana misy olona voafidy kanefa tsy mihavao ny toetrany fa mitoetra amin ‘ny faharatsiana hatrany?
Sampana Sekoly Alahady FOIBE FJKM