Ho avy ny Tompo!
Mofonaina anio: Asabotsy, faha 11 Novambra 2023
Jeremia 8.4-7
Jeremia 8.4-7
4 [Ny nikirizan'ny olona tamin'ny fanaovan-dratsy, sy ny hamafin'ny loza hanjo azy] Ary koa, lazao aminy hoe: Izao no lazain'i Jehovah: Ho lavo va ny olona ka tsy hiarina? Hihodina hivily va ny olona ka tsy hitodika hiverina? 5 Nahoana ity firenena eto Jerosalema ity* no miodina amin'ny fiodinana tsy mety mitsahatra? Mikikitra mafy amin'ny fitaka izy ka tsy mety miverina.[Heb. ity firenena Jerosalema ity] 6 Nihaino Aho, ka nandre, fa manao teny tsy marina izy: Ary tsy misy manenina ny amin'ny haratsiany hoe: Endrey izany nataoko izany! Izy rehetra dia samy mivily mankamin'ny alehany avy* tahaka ny soavaly miriotra ho amin'ny ady.[Na: samy mivily eny am-pandehanany] 7 Na dia ny vano eny amin'ny lanitra aza dia mahalala ny fotoan'androny, ary ny domohina sy ny sidintsidina ary ny vanobe koa samy mitandrina ny fotoana fihaviany; Fa ny oloko kosa tsy mba mahalala ny fitsipik'i Jehovah.Ho avy ny Tompo!
Dia mbola hanao ratsy ve isika ? Nahakivy ny Tompo ny zavatra niainan’ny olona tamin’ny andron’i Jeremia satria miodina Aminy, nikiry tamin’ny fanaovan-dratsy ary tsy nety nitsahatra tamin’izany na dia nasaina niverina tamin’Andriamanitra aza. Nambara mihitsy aza fa olona tsy mety miverina. Maro koa isika no mahakivy ny Tompo tahaka izany. Tonga mpanohitra an’Andriamanitra isika. Andao isika hiverina Aminy. Jereo ny fitiavany antsika « Esory ho afaka aminareo ny fahadisoanareo rehetra izay nataonareo, ka manaova fo vaovao sy fanahy vaovao ho anareo; fa nahoana no ho faty ianareo…? » (Ezek 18.31) Dia ambàka noho ny biby ve isika?
Misy biby maromaro ambaran’i Jeremia eto: soavaly miriotra ho amin’ny ady etsy an-kilany, ary ny vano sy ny domoina ary ny siditsidina sy ny vanobe etsy an-daniny. Iry voalohany dia lehibe nefa tsy mahalala izay alehany ary ireo faharoa dia kely kanefa mahay sy mahatsinjo ny hoaviny. Kanefa ny olona tsy mba miaina ny fitsipik’ Andriamanitra. Fitsipika izay mahatsara fifandraisana antsika amin’ Andriamanitra. Fa rehefa tonga sy ho avy ny Tompo dia handringana izay tsy miaina araka ny Teniny fa handray amim-pifaliana kosa izay mitoetra amin’ny finoana Azy.
Fampiharana :
Tanisao ireo toetra takian’ny Tompo aminao anio4
Sampana Sekoly Alahady FOIBE FJKM