Nahoana no tsy mitoky amin’Andriamanitra ny olona?
Mofonaina anio: Zoma, faha 27 Oktobra 2023
Sal 127:1-5
Salamo 127,1 - 5
1 [Ny fahatsinontsinon'ny ataon'ny olona, raha tsy ambinin'Andriamanitra] Fihirana fiakarana*. Nataon'i Solomona. Raha tsy Jehovah no manao ny trano, Dia miasa foana ny mpanao azy. Raha tsy Jehovah no miambina ny tanàna, Dia miari-tory foana ny mpiambina.[Na: Fihirana misy hevitra ambaratonga] 2 Zava-poana ho anareo ny mifoha maraina Sy ny alim-pandry Ka homana ny hanina azo amin'ny fahasahiranana; Izany anefa dia omeny ihany ho an'ny malalany, na dia matory aza izy. 3 Indro, lova avy amin'i Jehovah ny zanaka maro; Tamby ny ateraky ny kibo. 4 Tahaka ny zana-tsipìka eo an-tànan'ny mahery Ny zanaky ny fahatanorana. 5 Sambatra izay mameno ny tranon-jana-tsipìkany amin'ireny; Tsy ho menatra ireny, raha mifamaly amin'ny fahavalo eo am-bavahady.Ampitain’ny mpanao Salamo amintsika anio fa fanambinan’Andriamanitra no :
1- Mahalavorary ny ataon’ny olona
Voalaza mazava eto fa na inona na inona kasain’ny olona hatao, na inona na iona heveriny ho tanterahina dia tsy tontosa izany raha tsy miaraka amin’Andriamanitra izy. Mifofo volo mihitsy raha miseho ho mahavita tena ka mandeha araka ny saina sy fahalalana fotsiny tahaka ny « mpanao trano » miasa foana raha izay traikefany sy saim-patany no hiasany. Hamafisin’i Jesoa io raha milaza Izy hoe «raha misaraka amiko kosa ianareo, dia tsy mahay manao na inona na inona.» (Jao.15,5)
2- Isian’ny fitohizan’ny taranaka
Tena mazava mihitsy ny hoe: «lova avy amin’i Jehovah ny zanaka maro; tamby ny ateraky ny kibo» . Tena fanomezana avy amin’Andriamanitra mihitsy ny taranaka fa tsy vokatry ny fikambanan’olon-droa mivady fotsiny. Noho izany, adidin’izay nomena zanaka no mikolokolo sy mikojakoja tsara izany tombom-pahasoavana avy amin’ny Tompo izany. Mariky ny tsy fahaiza-mankasitraka ny fanaovana antsirambina ny fikarakarana ny taranaka, na amin’ny endriny manao ahoana na amin’ny endriny manao ahoana no isehon’izany. Koa misaora an’Andriamanitra raha nahazo taranaka.
3- Ahazoan’ny mino fandresena
«tsy ho menatra ireny, raha mifamaly amin’ny fahavalo eo am-bavahady». Mbola ny zanaka eto no lazaina fa sady tahian’Andriamanitra, ka tsy ho resy tosiky ny fahavalo na ho mora arodana, no tabiha sy reharehan’ny ray amandreny izay nahita fitia teo imason’ny Tompo.
Fanontaniana
Nahoana no tsy mitoky amin’Andriamanitra ny olona?
Sampana Sekoly Alahady FOIBE FJKM