Midera an’ Andriamanintsika
Mofonaina anio: Alahady, faha 15 Janoary 2023
APOKALYPSY 4.9-11
APOKALYPSY 4.9-11
9 Ary raha ny zava-manan'aina hanome voninahitra sy haja ary fisaorana ho an'ilay mipetraka eo ambonin'ny seza fiandrianana, dia Izay velona mandrakizay mandrakizay, 10 dia hiankohoka eo anoloan'izay mipetraka eo ambonin'ny seza fiandrianana ny loholona* efatra amby roa-polo ka hivavaka amin'izay velona mandrakizay mandrakizay, dia hanipy ny satro-boninahiny eo anoloan'ny seza fiandrianana ka hanao hoe: 11 Hianao, Tomponay sy Andriamanitray, no miendrika handray ny voninahitra sy ny haja ary ny hery; Fa Hianao no nahary ny zavatra rehetra, Ary noho ny sitraponao no nahanisy sy nahary azy.Midera an’ Andriamanintsika
Anisany mitana anjara toerana voalohany eo amin’ny fanompoam-pivavahana fanaon’ny Fiangonana kristiana ny fiderana an’Andriamanitra noho ireto antony ireto :
1-Izy no Tompo sy Andriamanitra
Amin’ity toko fahefatra ity no ilazan’ny mpanoratra ny toetoetry ny lapan’Andriamanitra any an-danitra sy ny fomba ataon’ireo mpanompo mba ho fiderana Azy. Miankohoka eo anatrehan’ i Jesoa Kristy,Ilay mipetraka eo amin’ny seza fiandrianana ny mpanompony ,manetry tena sy manaiky fa Izy no Tompo sy Andriamanitra . Izy no mendrika omem-boninahitra ,mendrika hajaina fa Izy no Ilay mahery . Ny tena fanompoam-pivavahana marina dia feno fanajana sy fanetrentena ka tsy mitodika afa-tsy amin’Andriamanitra irery ihany . Aiza ho aiza amin’izany ny fanompoam-pivavahana mbamin’ny hira fiderana tanterahan’ny Fiangonana ankehitriny.
2-Izy no nahary ny zavatra rehetra
Zava-dehibe amin’ny maha-olombelona antsika ny mahafantatra fa Andriamanitra no nahary ny zavatra rehetra ,ary anisan’ny zava-boahariny isika. Mendrika hoderaina sy omem-boninahitra Izy satria : »Izy no nahariana ny zavatra rehetra ,ary raha tsy Izy dia tsy nisy nahariana izao zavatra ary izao na dia iray aza »(Jao 1.3). Ny zava-mananaina hafa dia tsy afaka handinika sy hahalala ny maha-Andriamanitra mpahary Azy ,kanefa dia hita taratra amin. ‘izy ireny koa ny Voninahitr’Andriamanitra Mpahary Araka izany dia azo ambara fa anisan’ny antom-pisian’ny Fiangonana ny hidera an’Andriamanitra , satria Izy no Tompo sy Andriamanitra Mpahary .
Fanontaniana :
Voahajan’ny Fiangonana misy antsika ankehitriny ve ny fiderana sy fanomezam-boninahitra an’Andriamanitra ? Hazavao .
Sampana Sekoly Alahady FOIBE FJKM