Ny fiasan’Andriamanitra amin’ny mpanompony
Mofonaina anio: Talata, faha 13 Septambra 2022
ASAN'NY APOSTOLY 3.9-16
ASAN'NY APOSTOLY 3.9-16
9 Ary ny vahoaka rehetra nahita azy mitsangantsangana sy midera an'Andriamanitra. 10 Ary fantany tsara fa io no ilay nipetraka teo amin'ny vavahady Itsaraendrika eo amin'ny tempoly mba hiantrana; dia gaga sady talanjona ny olona noho izay tonga tamin-dralehilahy. 11 Ary raha nihazona an'i Petera sy Jaona izy, dia niara-nirohitra ny olona rehetra ho eo amin'izy telo lahy teo amin'ny fialofana izay atao hoe Fialofan'i Solomona, ka talanjona. 12 Ary Petera, nony nahita, dia namaly ny vahoaka hoe: Ry lehilahy Isiraely, nahoana no talanjona amin'izany ianareo? Ary nahoana no mandinika anay ianareo, toa herinay na fahamasinanay no nanaovanay azy ho afa-mandeha? 13 Andriamanitr'i Abrahama sy Isaka ary Jakoba, Andriamanitry ny razantsika, no nanome voninahitra an'i Jesosy Mpanompony*, Izay natolotrareo sy nolavinareo teo anatrehan'i Pilato, rehefa nokasainy halefa. [* Na: Zanany] 14 Fa ianareo nandà Ilay Masina sy Marina, ary mpamono olona no nangatahinareo halefa ho anareo; 15 fa ny Tompon'ny aina kosa no novonoinareo; fa Izy natsangan'Andriamanitra tamin'ny maty, ary vavolombelon'izany izahay. 16 Ary ny anarany no nampahatanjaka io lehilahy hitanareo sy fantatrareo io noho ny finoana ny anarany; eny, ny finoana izay azo amin'ny alalany no nahazoany izao fahasitranana tsara eto imasonareo rehetra izao.Ny fiasan’Andriamanitra amin’ny mpanompony
1-Mampitodika ny olona ho ao aminy
Nisy lehilahy iray malemy , mpangataka teo an-kianjan’ny tempoly . Rehefa nadalo i Petera sy Jaona dia nanantena fanampiana izy , fa nanasitrana amin’ny alalan’i Jesoa Kristy avy any Nazareta na nataony taminy . Izao asa nataon’i Petera sy Jaona izao dia hitodihan’ny olona ho ao amin’Andriamanitra , ka tsy ilay marary ihany fa izay nanatrika ihany koa . Maneho izany fa ilay Andriamanitra efa nitahy hatrizay dia tsy miova fa izy ihany no nanaraka an’i Jesoa ho amin’izao tontolo izao ,ka nasandrany ho amin’ny voninahitra , satria ny Anaran’i Jesoa Kristy dia efa voalazan’isaia 53.12 ,fa Izy no hahatanteraka ny asam-pamonjena . Naneho ny tenany ho fitaovana fotsiny ihany i Petera , fa ny tena manasitrana dia iJesoa .Ianao koa no ataon’Andriamanitra hampitodika ny olona ho ao Aminy .
2-Maneho no maha-zava-dehibe ny finoana
Nampahatsiavin’i Petera ny zavatra izay nanjo an’i Jesoa Kristy fony izy teto an-tany .Notanisain’i Petera izay ratsy nataon’ireto vahoaka ireto tamin’i Jesoa . Asehon’iPetera eto fa finoana an’i Jesoa ilay nitsangana tamin’ny maty no nahazoan’ity lehilahy ity fanasitranana .Mampahatsiaro ny tenin’I Jesoa tamin’ilay vehivavy mpanota tao an-tranon’i Simona fariseo hoe : » ny finoanao efa namonjy anao » (Lio 7.50) . Ny finoana dia mahasitrana , misy lanjany lehibe amin’ny Jiosy izany .
Fanontaniana:
Mazoto mikely aina ao amin’Andriamanitra ve ianao mba hisitrahan’ny hafa famonjena ?
Sampana Sekoly Alahady FOIBE FJKM