Toetra manao ahoana re no azo tanisaina momba anao e?
Mofonaina anio: Alarobia, faha 13 Jolay 2022
Filemona 1,1 - 7
1 [Fiarahabana an'i Filemona, sy fifonana ho an'i Onesimosy, ary fanaovam-beloma] Paoly, mpifatotra an'i Kristy Jesosy, ary Timoty rahalahy, mamangy an'i Filemona, izay malalanay sy mpiara-miasa aminay, 2 ary mamangy an'i Apia anabavinay sy Arkipo, miaramila namantsika, ary ny fiangonana ao an-tranonao: 3 ho aminareo anie ny fahasoavana sy ny fiadanana avy amin'Andriamanitra Raintsika sy Jesosy Kristy Tompo. 4 Misaotra an'Andriamanitro mandrakariva aho, raha mahatsiaro anao amin'ny fivavahako, 5 satria reko ny fitiavanao sy ny finoana* izay anananao ho an'i Jesosy Tompo sy ho an'ny olona masina rehetra, [* Na: ny finoanao] 6 mba hiasa mafy ho an'i Kristy ny fiombonana avy amin'ny finoanao amin'ny fahalalana tsara ny zavatra rehetra izay ao anatinareo. 7 Fa nanana fifaliana sy fiononana amin'ny fitiavanao aho, satria efa novelombelominao ny fon'ny olona masina, ry rahalahy.Tsikaritra amin’ny fomba fanoratr’i Paoly eto fa i Filemona dia:
1- Mpiara-miasa mahafatra-po (and. 1)
« Filemona ilay malalanay sy mpiara -miasa aminay no filazan’i Paoly azy, izany hoe: tena mpiara-miasa mahafatra-po tokoa i Filemona ka tian’ny hafa ny miara-miasa aminy. Tso-po sady tsy sarotra iaraha-miasa. Ny dikan’ny anarany rahateo dia hoe « ilay manoroka » ary mifanaraka amin’ny toetrany indrindra! lanao koa meteza ho namana akaikin’ny mpiara- manompo aminao ka mba ho « malalan’izy ireo »! Mianara amin’i Jesoa. fa rehefa tsy teo Izy dia nahatsiaro ho banga tanteraka ny mpianany.
2- Be fitiavana sady manam-pinoana (and 5)
Hoy i Paoly hoe: « satria reko my fitiavanao sy ny finoana izay anananao… ». Ao anatin’izany no hahatakarantsika fa mahafaly an’i Paoly (izay any am-ponja) ny fandrenesana ny toetran’i Filemona ary tena mampisaotra an’Andriamanitra mihitsy izany! lanao koa, aoka ho feno fitiavana mba hahay hitia ny mpiara-manompo fa nandidian’i Jesoa antsika rahateo anie ny hifankatiavantsika tahaka ny nitiavany antsika e! (Jao. 13, 34).
3- Azo antenaina (and 7a)
« Fa nanana fifaliana sy fiononana amin’ny fitiavanao aho satria efa novelombelominao ny fon’ny olona masina ry rahalahy ». Tsy fitiavana sy finoana « teorika » ny an’i Filemona fa niseho tamin’ny asa ary izany no nahatonga an’i Paoly sahy manoratra aminy hifona ho an’i Onesimosy mpanompony teo aloha, sy mba handraisany azy indray .
Fanontaniana:
Toetra manao ahoana re no azo tanisaina momba anao e?
Sampana Sekoly Alahady FOIBE FJKM