Anjara tsara ho an’izay mpivavaka marina
Mofonaina anio: Alakamisy, faha 11 Novambra 2021
Salamo 112. 1 - 20
Salamo 112. 1 - 20
1 [Salamo abidy. Ny toetry ny olona marina sy ny mahasambatra azy] Haleloia. Sambatra ny olona izay matahotra an'i Jehovah Sady mankasitraka ny didiny indrindra. 2 Hahery ambonin'ny tany ny zanany; Hotahina ny taranaky ny marina. 3 Fananana sy harena no ao an-tranony; Ary ny fahamarinany haharitra mandrakizay. 4 Ao amin'ny maizina no iposahan'ny mazava ho an'ny mahitsy; Mamindra fo sy miantra ary marina ireny*.[Na: Izy] 5 Sambatra ny olona izay miantra ka mampisambotra; Tsy mba ho resy eo am-pitsarana izy. 6 Fa tsy hangozohozo mandrakizay izy; Hotsarovana mandrakizay ny marina. 7 Tsy mba manahinahy hahare loza izy; Tafatoetra matoky an'i Jehovah ny fony. 8 Voatohana ny fony, ka tsy hatahotra izy, Mandra-pifaliny mahita ny amin'ny mpandrafy azy. 9 Namafy izy, eny, nanome ho an'ny malahelo; Ny fahamarinany maharitra mandrakizay; Hisandratra amim-boninahitra ny tandrony. 10 Ny ratsy fanahy hahita ka ho sosotra; Hihidy vazana izy ka ho levona; Ho foana ny fanirian'ny ratsy fanahy.Anjara tsara ho an’izay mpivavaka marina
Manambara ny fitahiana sy fampanantenam-piadanana ho an’ireo olo-marina sy matahotra an’Andriamanitra ity Salamo ity:
1- Tonga feno fitahiana :
Ny atao hoe mpivavaka marina eto dia izay voalazan’ny and.1 hoe » olona izay matahotra an’i Jehovah Sady mankasitraka ny didiny … ». Afaka miandrandra fitahiana maro izay olona toy izany. Ny zanany sy ny taranany ho voatahy . Azony avokoa ny fitahiana ara-nofo sy ara-panahy . Tsy hanam-panahiana na dia tojo zava-tsarotra aza. Izany rehetra izany no ahatsiarovana fa tsy ho menatra izay manana an’Andriamanitra sy manompo Azy satria efa voalazany rahateo hoe « Ka dia ho hitanareo indray ny tsi-fitovian’ny marina sy ny meloka, dia ny manompo an’Andriamanitra sy ny tsy manompo Azy » (Mal. 3. 18). Jesoa dia efa nampianatra antsika mandrakariva fa loharanom-pitahiana ny fanarahana ny Teniny. » Raha miray amiko ianareo, ka mitoetra ao anatinareo ny teniko, dia angataho izay tianareo na inona na inona, fa ho tonga aminareo izany » (Jao. 15. 7)
2- Tonga feno fahatsarana :
Ny atao hoe mpivavaka marina ihany koa eto dia ireo izay miantra ka ampisambotra araka ny voalazany hoe » Sambatra ny olona izay miantra ka mampisambotra » (and. 5). Ary dia hitantsika araka izay voalazan’ny andininy manaraka ny fahamarinan-toeran’ireo mpivavaka marina eo amin’ny fiainany. Tsy hampivadi-po azy ireo ny fampihorohoroana isan-karazany, ary hanana fiadanan-tsaina. Tafatoetra ny fony ka na eo aza ny loza maro samihafa dia mitoetra ho feno fiadanana hatrany izy satria Jehovah no momba azy. Irian’Andriamanitra ho antsika koa izany ka hananarany antsika mba ho tonga mpivavaka marina. Ny fitiavan-tena no manjaka ankehitriny ka zary tsy hita ny tena mpivavaka marina. Tsaroantsika avy hatrany ny tenin’i Jesoa hoe « Sambatra ny miantra; fa izy no hiantrana » (Mat. 5. 7) dia miantra antsika tokoa ny Tompo !
Fanontaniana : Efa tonga mpivavaka marina ve ianao ?
Sampana Sekoly Alahady FOIBE FJKM