Tafatoetra ny fon’izay miandry ny Tompo
Mofonaina anio: Asabotsy, faha 06 Novambra 2021
LIOKA 12.22-31
LIOKA 12.22-31
22 Ary hoy Jesosy tamin'ny mpianany: Noho izany dia lazaiko aminareo hoe: Aza manahy ny amin'ny ainareo, izay hohaninareo, na ny amin'ny tenanaren, izay hotafinareo. 23 Fa ny aina mihoatra noho ny hanina, ary ny tena noho ny fitafiana. 24 Hevero ny goaika; fa tsy mba mamafy na mijinja ireny; ary tsy manana fitoeran-javatra na trano fitehirizana, nefa Andriamanitra mamelona azy; tsy mihoatra lavitra noho ny vorona va ianareo? 25 Ary iza moa ao aminareo, na dia manahy aza, no mahay manampy ny andro iainany*, na dia kely monja** aza? [*Na: ny halavan'ny tenany] [**Gr. hakiho iray] 26 Koa raha ny kely indrindra aza tsy hainareo, nahoana ianareo no manahy ny amin'ny sisa? 27 Hevero ny fanirin'ny voninkazo*; tsy mba miasa na mamoly ireny; nefa lazaiko aminareo: Na dia Solomona teo amin'ny voninahiny rehetra aza tsy mba nitafy tahaka ny anankiray amin'ireny.[* Karazan'ny lilia] 28 Ary raha ny ahitra izay any an-tsaha anio, nefa hatao ao am-patana rahampitso, no ampitafin'Andriamanitra toy izany, tsy mainka va ianareo ry kely finoana? 29 Koa aza mitady izay hohaninareo na izay hosotroinareo ianareo, ary aza miahanahana*.[*Na: aza aingaingain'ny fanantenana foana] 30 Fa ny jentilisa amin'izao tontolo izao dia fatra-pitady izany rehetra izany; fa ny Rainareo mahalala fa tokony ho anareo izany zavatra izany. 31 Kanefa katsaho ny fanjakany*; dia hanampy ho anareo izany zavatra izany.[*Na: (ny fanjakan'Andriamanitra)]Tafatoetra ny fon’izay miandry ny Tompo
1-Aza manahy
Toetra iray mampiavaka ny olombelona ny fanahiana . Saiky ny ampahany betsaka amin’ny asa ataontsika dia fiahiana ny ho avintsika avokoa .Tsy tompon’ny ampitso anefa isika ka hafaran’ny Tompo eto hoe : « aza manahy« .Tsy midika akory izany fa tsy tokony hiasa isika , fa tian’Andriamanitra hiverina ao amin’ny fitantanany .Tian’ny Tompo ny hametrahantsika Aminy ny zavatra ho avy rehetra .« …ny amin’ny zavatra ho avy no anontanio Ahy, ary ny zanako sy ny asan’ny tĂ nako dia aoka ho adidiko ihany » (Isa 45.11) . Ny fanahiana no toe-tsaina tokony hialantsika voalohany raha vao mivavaka amin’Andriamanitra isika. Izay efa napetrantsika teo am-pelatĂ nany dia aza esorina eo Aminy intsony fa avelao ho adidiny . Aza mitebiteby ny amin’ny ho avy fa Jesoa efa nampanantena fa homba antsika .
2-Katsaho ny fanjakany
Ny teny hoe : « kanefa katsaho » eto sy ny hoe: « katsaho aloha » (Mat 6.33) dia manambara fa tsara lavitra mihoatra ny fikatsahana ny fanjakan’ Andriamanitra ny zavatra mandalo ety an-tany .Azo lazaina ihany koa hoe : ny fikatsahana ny fanjakan’Andriamanitra no hahazoan-droa , izany hoe : azonao ho azy ny fiadanana ety an-tany rehefa mikatsaka ny an’ Andriamanitra ianao . Te-hanampy antsika ho amin’ny fiadanana Andriamanitra ka manoro ny tena lĂ lana andehanana dia ny fikatsahana ny fanjakany . Amin’izany , ny hoe : mikatsaka dia asa maharitra sy mila fiezahana . Izay tokony hametrahantsika ny fanahiantsika dia ny fahatrarantsika na tsia ny fanjakan’ny lanitra . Fa ny fiahiana ny fiainantsika dia efa an’ Andriamanitra rahateo , raha mazoto mikatsaka ny fanjakany isika . Tiany hanana fiombonam-piainana Aminy isika hahatanteraka ny Teniny hoe : « zava-poana ho anareo ny mifoha maraina sy ny alim-pandry ka homana ny hanina azo amin’ny fahasahiranana . Izany anefa dia omeny ihany ho an’ny malalany na dia matory aza izy  » (Sal 127.2) . Izay manao ny sitrapony tahaka ny zanany no malalany .
Fanontaniana :
Mbola te-hitoetra amin’ny fiainana feno fanahiana ve ianao ?
Sampana Sekoly Alahady FOIBE FJKM