Tafatoetra ny fon’izay miandry ny Tompo
Mofonaina anio: Alakamisy, faha 04 Novambra 2021
SALAMO 108.1-6
SALAMO 108.1-6
1 [Fahatokiana an'Andriamanitra sy fanantenana ny heriny haharesy ny fahavalo] Tonon-kira. Salamo nataon'i Davida. Andriamanitra ô, tafatoetra ny foko; Ny fanahiko* no hihira sy hankalaza.[Heb. ny voninahitro] 2 Mifohaza, ry valiha sy lokanga; hifoha maraina koa aho*. [Na: hampifoha ny maraina aho] 3 Hidera Anao eny amin'ny firenena maro aho, Jehovah ô, Ary hankalaza Anao eny amin'ny jentilisa. 4 Fa lehibe mihoatra ny lanitra ny famindram-ponao; Ary mipaka eny amin'ny rahona ny fahamarinanao. 5 Misandrata any ambonin'ny lanitra Hianao, Andriamanitra ô; Ary aoka ho et? ambonin'ny tany rehetra ny voninahitrao. 6 Mba hahafaka ny malalanao, Dia vonjeo amin'ny tananao ankavanana aho, ka valio.Tafatoetra ny fon’izay miandry ny Tompo
« Andriamanitra ô, tafatoetra ny foko » . Io teny io no hanombohan’i Davida ity Salamo ity . Tononkira manambara fatokiana an’Andriamanitra .
1-Toerana azo antoka ao Aminy
Eo anatrehan’ny ady sy zava-tsarotra atrehantsika eo amin’ny fiainana dia mampianatra antsika ity Soratra masina ity fa misy toerana azo antoka tanteraka. Davida no manambara izany eto , satria efa niaina sy ampy traikefa ny amin’izany . Vokatry ny fitoerany tao amin’Andriamanitra no mampilolotra ny fiderana tao am-pony hoe :  » ny fanahiko no hihira sy hankalaza « . Mahagaga izany hoe :  » ny fanahiko no hihira sy hankalaza« . Mahagaga izany hoe : feno hafaliana raha handeha hiatrika ady . Matetika fitaintainana aza no misy eo anoloan’ny ady . Toy izany koa ianao , raha misafidy hitoetra ao amin’Andriamanitra , satria ny adinao dia iandraiketan’Andriamanitra (Vakio Eks 14.14) , ary i Jesoa dia efa niteny hoe:  » …Indro , Izaho momba anareo mandrakariva ambara-pahatongan’ny fahataperan’izao tontolo izao  » (Mat 28.20)
2-Mampiadam-po ao Aminy
Ny fiderana izay ataon’i Davida eto no taratry ny finoana ao anatiny . Hita ao anatin’ity Salamo ity ny fanantenana lehibe sy ny finoana matanjaka nananany . Eo amin’ny and 6 dia manambara izy hoe: « mba hahafaka ny malalanao... », mahatsiaro Davida fa malalan’ Andriamanitra . Raha vao mahita izany isika dia tsaroantsika ilay Teny feno fitiavana nataon’Andriamanitra hoe : « zava-poana ho anareo ny mifona maraina sy ny alim-pandry ka homana ny hanina azo amin’ny fahasahiranana . Izany anefa dia omeny ho an’ny malalany , na dia matory aza izy » (Sal 127.2). Teny izay manambara ny fandraisan’ Andriamanitra an-tà nana ny amintsika sady fametrahany antsika ho amin’ny laharam-pitoviana amin’ny zanany . »Ity no zanako malalako izay sitrako »(Mat 3.17) . Aoka isika mba hanana izany fiadanampo izany koa raha miatrika zava-tsarotra .
Fanontaniana :
Aiza no itoeran’ny finoanao?
Sampana Sekoly Alahady FOIBE FJKM