Mpitory Filazantsara ianao, inona ny fiadanana azonao?
Mofonaina anio: Asabotsy, faha 19 Septambra 2020
ASA 9.26-31
Asan'ny Apostoly 9,26 - 31
26 Ary rehefa tonga tany Jerosalema Saoly, dia nitady hiray tamin'ny mpianatra; fa izy rehetra natahotra azy ka tsy nino azy ho mpianatra. 27 Fa Barnabasy naka azy ka nitondra azy ho any amin'ny Apostoly, dia nanambara taminy ny nahitany ny Tompo sy ny nitenenany taminy teny an-dalana ary ny fahasahiany nitory ny anaran'i Jesosy tany Damaskosy. 28 Ary izy niara-niditra sy nivoaka tamin'ireo tany Jerosalema, 29 sady nitory tamin'ny anaran'ny Tompo tamin'ny fahasahiana ary niresaka sy niady hevitra tamin'ny Helenista; fa ireny nitady hahafaty azy. 30 Ary rehefa fantatry ny rahalahy izany, dia nentiny nidina nankany Kaisaria izy ka nampandehaniny ho any Tarsosy. 31 Dia nanam-piadanana ny fiangonana eran'i Jodia sy Galilia ary Samaria rehetra, sady nandroso tsara sy nandeha tamin'ny fahatahorana ny Tompo sy ny famporisihan'ny Fanahy ka nihamaro.1-Barnabasy nampifandray ny Apostoly tamin’i Saoly (and 26-30)
Mety ho lĂ lana efa nolalovanao koa izao lĂ lana ho amin’ny fiovam-po teo amin’i Saoly izao . Satria rehefa nifanena tamin’ny Tompo i Saoly dia nanapa-kevitra hitory ny Filazantsara , kanefa feno fisalasalana ihany ny maro satria izy dia mpanenjika ny fivavahana . I Barnabasy no fitaovan’Andriamanitra hisian’ny fifandraisana teo amin’ny mpitory ny Filazantsara , mba hisian’ny fiombonana.Tranga mety efa niseho teo amin’ny fiainan’ny Fiangonana koa izany noho ny fisian’ny fifohazam-panahy . Mety ho ianao io, toa an’i Barnabasy hisian’ny fifandraisana samy mpitory ny Filazantsara mba handrosoan’ny asa izay atao amin’ny fahatahorana an’Andriamanitra fa tsy amin’ny fireharehana . Jesoa dia nifidy anao . Aza ailika izay miara-mitory aminao , fa namanao izy.
2-Nanam-piadanana ny Fiangonana
Izao fiovampon’ ny fahavalo izao no lasa nampisy ny firaisana , nihanatanjaka ny Fiangonana noho ny Filazantsara notoriana, nihamatotra ara-panahy ny Fiangonana satria nandeha tamin’ny fahatahorana an’Andriamanitra ary nihamaro ireo nijoro ho vavolombelona noho ny herin’ny Fanahy Masina . Ambaran’ny mpanoratra tokoa izany , fa io fahatahorana ny Tompo io dia hita ao amin’ny Filazantsara (Lio 1.50; 18.2; 23.40). Ary ao amin’ny Asan’ny Apostoly dia hita fa ireo izay nanana tahotra an’Andriamanitra no nijoro ho fanamarihana ny fiatombohan’ny asa fitoriana ny Filazantsara (toko 10.2/22.35/13.16/16.26) . Ny fahatahorana an’Andriamanitra no miteraka fahatokiana sy fankatoavana , ary izany no nitondra ny Fiangonana ho amin’ny fiadanana ao amin’ny Tompo .
Fanontaniana :
Mpitory Filazantsara ianao, inona ny fiadanana azonao?
Sampana Sekoly Alahady FOIBE FJKM