Miasà amin’ny fatahorana an’Andriamanitra
Mofonaina anio: Alatsinainy, faha 14 Septambra 2020
EFESIANA 6.1-9
EFESIANA 6.1-9
1 Anaka, maneke ny ray sy ny reninareo ao amin'ny Tompo, fa marina izany. 2 Manajà ny ray sy ny reninao (fa izany no didy voalohany misy teny fikasana), 3 mba hahita soa ianao sy ho maro andro ambonin'ny tany (Deo. 5. 16). 4 Ary ianareo ray, aza mampahatezitra ny zanakareo, fa tezao amin'ny famaizana sy ny fananaran'ny Tompo izy. 5 Hianareo mpanompo, maneke ny tomponareo araka ny nofo amin'ny fahatahorana sy ny fangovitana, amin'ny fahatsoran'ny fonareo, toy ny fanekena an'i Kristy ihany, 6 tsy amin'ny fanompoana eo imaso, tahaka ny mpila sitraka amin'olona, fa tahaka ny mpanompon'i Kristy manao izay sitrapon'Andriamanitra amin'ny fo, 7 amin'ny sitrapo manao fanompoana toy ny amin'ny Tompo, fa tsy amin'olona, 8 satria fantatrareo fa izay soa ataon'ny olona rehetra no horaisiny amin'ny Tompo, na andevo na tsy andevo izy. 9 Ary ianareo tompo, manaova toy izany aminy kosa, ka atsaharo ny fandrahonana, satria fantatrareo fa ny Tompony sady Tomponareo koa dia any an-danitra; ary tsy misy fizahan-tavan'olona aminy.Miasà amin’ny fatahorana an’Andriamanitra
Ny fanekena sy ny fankatoavana no tokony hifehy ny fifandraisana sy ny andraikitra eo amin’ny sehatra omena . Koa ny kristiana dia miasa amin’ny fatahorana an’Andriamanitra .
1-Eo anivon’ny ankohonana
Ny ankohonana no sehatra ifandraisan’ny Ray aman-dreny sy ny zanaka, izay anehoana ny fitiavana sy ny fankatoavana . Didina ny zanaka mba hankato ny rainy sy ny reniny (and1), maneho fanajana (Deo 5.16) . Asa ny manaja , manaiky , manaraka toromarika eo anivon’ny ankohonana ary koa fatahorana an’Andriamanitra izay tompon’ny fandaminana. Ny ray aman-dreny koa dia hanao ny andraikiny am-pitiavana ombam-patahorana , manazatra ny zanany amin’ny fahamarinana sy fifehezantena indrindra ny fatahorana an’ Andriamanitra;
2-Eo anivon’ny asa (and 5-9)
Amin’i Paoly Apostoly dia misy dikany sy antony eo anatrehan’ Andriamanitra avokoa ny fanompoana . Koa ny fifandraisan’ny mpampiasa sy ny mpiasa dia heverina fa tsy kisendrasendra fa hanehoana ny fatahorana an’Andriamanitra Ilay Tompon’ny asa . Izao no voasoratra : »na inona na inona ataonareo na amin’ny teny na amin’ny asa dia ataovy amin’ny Anaran’ny Tompo , ka misaora an’Andriamanitra Ray amin’ny alalany » (Kol 3.17). Ampiharo izany eo anivon’ny asam-panjakana , asehoy ny fankatoavana feno fanajana sy fatahorana an’Andriamanitra ary ataovy amin’ny fahatsoran’ny fo (and 5). Ny fatahorana an’Andriamanitra no tokony haseho eo amin’ny asa atao , fa tsy ny fatahorana tompo izay olombelona ihany . Tsy hila sitraka na hiasa ho hitan’ny hafa ( filan-dera izany) fa izay atao dia ho fatahorana an’Andriamanitra maniraka hiasa .
Fanontaniana :
Tena mijoro ho mpanompon’Andriamanitra teo amin’ny asa nanirahana ve ianao?
Sampana Sekoly Alahady FOIBE FJKM