MAHATOKY HATRAMIN’NY FAHAFATESANA NY MINO
Mofonaina anio: Alahady, faha 02 Aogositra 2020
ASAN'NY APOSTOLY 20.17-24
ASAN'NY APOSTOLY 20.17-24
17 [Ny anatra nataon'i Paoly tamin'ny loholon'ny fiangonana tao Efesosy] Ary raha tany Mileto Paoly, dia naniraka hankany Efesosy izy ka nampaka ny loholon*'ny fiangonana** hankeo aminy. [* Gr. presbytera] [**Gr. eklesia] 18 Ary nony tonga teo aminy ireo, dia hoy izy taminy: Fantatrareo hatramin'ny andro voalohany nahatongavako teto Asia izay toetry ny fitondran-tenako taminareo tamin'izany andro rehetra izany, 19 dia ny nanompoako ny Tompo tamin'ny fanetren-tena rehetra sy ny ranomaso ary ny fakam-panahy izay nanjo ahy tamin'ny fanotrehan'ny Jiosy, 20 ka tsy mba nafeniko izay mahasoa, fa nambarako sy nampianariko anareo teo imason'ny olona ary tao amin'ny isan-trano; 21 ary nambarako tamin'ny Jiosy sy ny jentilisa* koa ny fibebahana amin'Andriamanitra sy ny finoana an'i Jesosy Kristy Tompontsika. [* Gr. Grika] 22 Ary ankehitriny, indro, tery* am-panahy hankany Jerosalema aho, nefa tsy fantatro izay hanjo ahy any, [* mifatotra] 23 afa-tsy izay ambaran'ny Fanahy Masina amiko amin'ny isan-tanàna, fa hisy famatorana sy fahoriana hanjo ahy. 24 Nefa tsy ataoko ho zavatra akory ny aiko, mba hahavita ny alehako, dia ny fanompoana izay noraisiko tamin'i Jesosy Tompo hanambara ny filazantsaran'ny fahasoavan'Andriamanitra.MAHATOKY HATRAMIN’NY FAHAFATESANA NY MINO
Atao hoe : lahateny fanaovam-beloma nataon’i Paoly tamin’ireo loholon’ny Fiangonana naoriny ny ASA 20.18-35 . Nolazainy fa mila itoriana ny Filazantsara koa ny toerana hafa . Koa naneho izy eto fa ny toe-panahy nentiny nanompo ny Tompo dia :
Ambaran’i Paoly tamin’ireto loholona ireto fa tsy nanao kitoatoa ny asa fanompoany velively izy ary vavolombelon’izany ireto olona niresahany ireto . Tena feno fanetretena mihitsy izy tamin’izany , ka na dia nampitomany tokoa aza ny nanjo azy noho ny nataon’ny Jiosy tamin’ny fanembatsembanana azy tsy hahavitany ny fanompoany .
2-Tamin’ny fitoriana sy fampianarana izay mahasoa
Nitory ny Filazantsara sy nampianatra ny kristiana izy tamin’izany ka nikendry indrindra izay mahasoa ny olona fa tsy nisy eritreritra handany andro fotsiny akory na nanao izay handrebirebena olona koa . Zava- misy eo amin’ny fitoriana sy fampianarana ny Filazantsata mantsy izany : misy mody mitoritory sy mampianatranatra eo fotsiny nefa zavatra hafa no tanjony . I Paoly kosa dia nitompo teny fantatra fa tsy nanao toy izany raha nitory sy nampianatra ny Fiangonana .
3-Tamin’ny fahafoizan-tena tanteraka
Ny tanjony amin’ny asa fanompoany dia ny hahatanteraka ny fitoriana ny Filazantsara , ka na inona na inona hahatanteraka izany dia vonona izy , na hatramin’ny ainy aza. Izany no nanomezana azy anarana hoe : Misionera lehibe indrindra eo amin’ ny tantara.
Fanontaniana :
Ahoana izany manao fanompoana marina ho an’ny Tompo izany ?
Sampana Sekoly Alahady FOIBE FJKM