Jesoa Ilay MESIA
Mofonaina anio: Zoma, faha 24 Jolay 2020
JAONA 4.25-30
JAONA 4.25-30
25 Hoy ravehivavy taminy: Fantatro fa avy ny Mesia (Ilay atao hoe Kristy); ka rehefa tonga Izy, dia hambarany amintsika ny zavatra rehetra. 26 Hoy Jesosy taminy: Izaho Izay miresaka aminao no Izy. 27 Ary tamin'izay dia tonga ny mpianany ka gaga, satria vehivavy no niresahany; nefa tsy nisy nanao hoe: Inona no tadiavinao? na: Nahoana no miresaka aminy Hianao? 28 Dia nandao ny sininy ravehivavy ary nankany an-tanàna ka nanao tamin'ny olona hoe: 29 Andeha hizaha izaroa Lehilahy izaroana, Izay nilaza tamiko ny nataoko rehetra; Izao angaha no Kristy? 30 Dia nivoaka avy tao an-tanàna ny olona ka nankeo amin'i Jesosy.Jesoa Ilay MESIA
1-Manambara ny tenany
« Hoy Jesoa taminy : Izaho izay miresaka aminao no Izy » (and26)
Teo am-piandrasana ny fiavian’ny Mesia na Kristy ny Jiosy tamin’ny fotoana niresahan’i Jesoa tamin’Ilay vehivavy Samaritana . Tsy Mesia hamonjy izao tontolo izao amin’ny fahotana anefa fa Mesia hanafaka azy amin’ny fanjanahan’ny Romana. Ity vehivavy Samaritana ity kosa rehefa nandre ny fampianarana nataon’i Jesoa dia nanantena famonjena avy taminy , na dia tsy fantany aza fa Izy no Mesia . Noho izany , nanambara ny tenany taminy Izy . I Jesoa dia manambara ny tenany amin’ny olona miandrandra sy manantena ny famonjena avy Aminy , eny fa na dia izay tsy mbola mahafantatra Azy aza.
2- Ambara amin’ny hafa
« Andeha hizaha izaroa lehilahy izaroa » (and29) .
Vao nandre ny fanambaran-tena nataon’i Jesoa taminy ity vehivavy Samaritana ity dia nandao ny sininy teo am-pantsakana , ka nankany an-tanàna nanambara tamin’ny olona momba an’i Jesoa sady nitaona ny olona hanatona Azy . Ny finoany ny Tenin’i Jesoa no nanetsika azy hanambara izany tamin’ny mpiara-monina taminy . Araka izany , ny olona mandre ny fanambaran-tena ataon’i Jesoa ka mino izany no manambara izany amin’ny hafa . Mariky ny finoana ny maha-Mesia an’i Jesoa ny finiavan’ny olona hanambara Azy amin’ny hafa . Adidin’ny olona mandre sy mino ny Tenin’i Jesoa Kristy ny manambara amin’ny hafa mba hanatonan’izy ireo an’i Jesoa handraisany famonjena .
Fanontaniana :
Efa mino ny fanambaran-tena nataon’i Jesoa ve ianao ? Inona ny andraikitra efa noraisinao taoran’izany ?
Sampana Sekoly Alahady FOIBE FJKM