Ny fitoriana ny Filazantsara
Mofonaina anio: Talata, faha 21 Jolay 2020
Asan'ny Apostoly 13,44 - 50
44 Ary nony tamin'ny Sabata manaraka, dia saiky tafangona avokoa ny tao an-tanàna hihaino ny tenin'Andriamanitra. 45 Nefa ny Jiosy kosa, raha nahita ny vahoaka betsaka, dia feno fialonana ka nanohitra ny teny nolazain'i Paoly, sady niteny ratsy*. [* Gr. nanao blasfemia, izahao Mat. 9.3] 46 Ary Paoly sy Barnabasy dia niteny tamin'ny fahasahiana ka nanao hoe: Hianareo no tsy maintsy nitoriana ny tenin'Andriamanitra aloha; fa rehefa mandà izany ianareo ka manao ny tenanareo ho tsy miendrika hahazo fiainana mandrakizay, dia indro, mitodika mankany amin'ny jentilisa izahay; 47 fa izao no nandidian'ny Tompo anay: Efa nanendry Anao ho fahazavan'ny jentilisa Aho, Mba ho famonjena hatrany amin'ny faran'ny tany Hianao (Isa. 49. 6). 48 Ary rehefa nandre izany ny jentilisa, dia faly izy ka nankalaza ny tenin'Andriamanitra*; ary izay voalahatra ho amin'ny fiainana mandrakizay dia nino. [* Na: ny tenin'ny Tompo] 49 Ary ny tenin'ny Tompo dia naely eran'izany tany rehetra izany. 50 Fa ny Jiosy nampitaitra ny vehivavy manan-kaja izay nivavaka sy ny lehibe tao an-tanàna, dia nahatonga fanenjehana tamin'i Paoly sy Barnabasy ireny ka nandroaka azy niala tamin'ny taniny.Ny fitoriana ny Filazantsara
1-Natao ho an’ny olona rehetra(and 46)
Raha nandre ny toriteny nataon’i Paoly tamin’ny andro sabata ny Jiosy dia nialona azy noho ny hamaroan’ny olona nihaino izany . Nambaran’i Paoly tamin’izany fa natao ho lohalaharana amin’ny fandrenesana ny Filazantsara ny Jiosy , saingy raha nandà izany izy dia mbola ao ny Jentilisa izay vonona hihaino ny Tenin’Andriamanitra . Noho izany , ny Filazantsaran’i Jesoa Kristy dia natao ho an’ny olona rehetra . Ka na dia misy aza ny natao ho laharam-pahamehana amin’ny fandrenesana izany misy ny tsy mety mino . Misy kosa mahita fifaliana amin’ny fihainoana azy , fa izany no làlana tokana hahazoana mandova ny fiainana mandrakizay .
2-Mampiharihary ny toetran’ny tsirairay
Samy nanana ny fandraisany ny toriteny nataon’i Paoly ny olona nihaino azy . Tao ny nialona azy , noho ny fandrosoan’ny fitoriana ny Filazantsara sady « niteny ratsy » , izany hoe : nanohitra ny maha-Kristy an’i Jesoa (and 45) , tao ny nanao ny fomba rehetra mba handroahana an’i Paoly sy Barnabasy teo amin’ny taniny (and 50) , ary tao ny faly indrindra raha nandre izany (and 48) . Araka izany , ny fitoriana ny Filazantsara dia mampiharihary ny miafina ao am-pon’ny tsirairay momba ny finoana an’iJesoa Kristy . Kanefa na mino na tsy mino an’i Jesoa Kristy no olona nandre ny Filazantsara , dia feno fifaliana sy Fanahy Masina hatrany ny mpitory , satria nahatanteraka ny iraka nampanaovina azy dIa ny hitory Filazantsara amin’ny olona rehetra.
Fanontaniana :
Raha mandre mpitory Filazantsara ianao , inona amin’ireo toetra voatanisa ireo no mibahan-toerana ao anatinao ?
Sampana Sekoly Alahady FOIBE FJKM