Inona no efa nataonao hanatsaranao ny fifandraisana amin’ny namanao?
Mofonaina anio: Alarobia, faha 17 Jona 2020
Levitikosy 19,16 - 18
16 Aza mandehandeha manaratsy eo amin'ny firenenao; aza mitsangana handatsaka ny ran'ny namanao: Izaho no Jehovah. 17 Aza mankahala ny rahalahinao amin'ny fonao; mananara dia mananara ny namanao, mba tsy hahazoanao heloka noho ny aminy. 18 Aza mamaly ratsy na manao lolompo amin'izay iray firenena aminao: fa tiava ny namanao tahaka ny tenanao: Izaho no Jehovah.MIHAVANA AO AMIN’NY TOMPO
Mampiavaka ity toko faha-19 ity ilay Teny mialoha eo amin’ny and 2 hoe : « Aoka ho masina ianareo , satria Masina Aho Jehovah Andriamanitrareo » . Izany no fototry ny zava-boalaza amin’ny andininy manaraka rehetra.
1-Aza mifanaratsy (and 16)
Ny olona rehetra tao amin’ny firenena dia voafidy sy natokan’Andriamanitra ho Azy. Koa ny fanaratsiana ny hafa dia midika fanaratsiana Ilay nifidy (vakio Jao 15.16) .Izany rahateo dia mifanohitra amin’ny sitrapon’Andriamanitra tiany hotanterahin’olona (1 Kor 10.24).
2-Aza mifankahala (and17-18)
Ny fifandraisan’ny mpirahalahy ambaran’ity perikopa ity dia taratry ny fahamasinan-toetra ananan’ny olona izay ao amin’Andriamanitra . Ambara mihitsy aza moa eto fa isaina ho isan’ny heloka ny fifankahalalana . Tsy ny Andriamanitra ivavahana ihany mantsy no tokony iombonan’ny olona fa ny toe-panahy sy toe-tsaina ihany koa. Ny fifankahalana no fototry ny fisarahana , fa ny fifankatiavana kosa no fototry ny fiombonana ao amin’Andriamanitra . Jesoa dia nanamafy izany , araka ny voalazany hoe : “Izany no hahafantaran’ny olona rehetra fa mpianatro ianareo raha mifankatia” (Jao 13.35).
Fanontaniana :
Inona no efa nataonao hanatsaranao ny fifandraisana amin’ny namanao?
Sampana Sekoly Alahady FOIBE FJKM