Fiaraha-monina voahodidina fitahiana
Mofonaina anio: Alahady, faha 07 Jona 2020
SALAMO 133.1-3
SALAMO 133.1-3
1 [Ny mahatsara ny fifankatiavana] Fihirana fiakarana*. Nataon'i Davida. Endrey, tsara sady mahafinaritra Raha ny mpirahalahy no miara-monina [Na: Fihirana misy hevitra ambaratonga] 2 Tahaka ny diloilo tsara amin'ny loha, Izay mitsororoka amin'ny somotra, dia ny somotr'i Arona, Izay mitsororoka amin'ny moron-tongotr'akanjony*; [Na: vozon'akanjony] 3 Tahaka ny ando any Hermona, izay milatsaka amin'ny tendrombohitra Ziona; Fa voadidin'i Jehovah ho eo ny fitahiana, Dia fiainana ho mandrakizay.Fiaraha-monina voahodidina fitahiana
Raha vao miresaka fiaraha-monina isika dia tsy tokony hanadino fa olona maro miara-miaina na miara-monina no ao , olona samy manana izay fomba fisainany sy fijeriny kanefa miara-miaina . Voahodidina fitahiana ny fiaraha-monina iray izay mifampitondra toy ny mpirahalahy ao amin’ny Tompo .
1-Kristiana miombona sy miray (and1)
Ny hoe: miara-monina dia miombom-piainana .Tsy nataon’ Andriamanitra hitoka-monina ny olombelona fa nataony hiara-monina ka tsy maintsy miombom-piainana . Mirindra sy milamina ny fiaraha-miaina rehefa mifankatia, ka tsy mba mihatsaravelatsihy ny mpiara-monina.Taomin’i Davida hifampitondra toy ny mpirahalahy ny olona , indrindra ny kristiana , mifankatia marina. Tsy hoe: tsy maintsy hitovy hevitra ny rehetra fa na dia samy manana ny maha-izy azy aza ka samy manana ny fomba fijeriny sy fisainany dia fatoran’ny fifakatiavana kosa anefa .Io fitiavana io no mampiombona .
2-Kristiana manana an’I Jesoa Kristy
Raha vao miresaka fiombonana isika , indrindra fa ny Fiangonan’ Andriamanitra no resahina dia tsy misaraka amin ny fiombonana amin’ i Jesoa izany. Zava-poana , poaka aty ny fiombonana tsy ao amin’i Jesoa Kristy . Jesoa no tena mampiombona marina , ary ao Aminy vao tena azo antoka ny firaisana tena marina . Ao amin’i Jesoa no azo antoka ny fahaiza-mifandefitra , mifanaja, mfamela heloka amin’ny firaisa-monina . Rehefa ao amin’i Jesoa ny fiombonana sy ny firaisana vao tena mahatonga fitahiana ho an’ny rehetra. Jesoa no antoka hitahian’Andriamanitra ny fiaraha-monina .
Fanontaniana:
Fitahiana toy ny ahoana no azo antenaina avy amin’ i Jesoa?
Sampana Sekoly Alahady FOIBE FJKM