Vonona mandray ny olona miverina Aminy ve ny Tompo Andriamanitra?
Mofonaina anio: Alarobia, faha 25 Martsa 2020
Lioka 15,11 - 24
11 Ary hoy Jesosy: Nisy lehilahy anankiray nanana zanaka mirahalahy. 12 Ary hoy ilay zandriny tamin-drainy: Raiko, omeo ahy ny anjara-fananana tokony ho ahy. Dia nozarainy tamin'izy mirahalahy ny fananany. 13 Ary nony afaka kelikely, dia nangonin'ilay zandriny ny fananany rehetra, ka lasa nankany an-tany lavitra izy, dia nandany ny fananany tamin'ny fiveloman-dratsy tany. 14 Ary rehefa laniny avokoa ny fananany rehetra, dia nisy mosary mafy tamin'izany tany izany, ka nahantra izy. 15 Dia nandeha izy ka niankina tamin'ny tompon-tany anankiray tamin'izany tany izany, ary dia nirahiny tany an-tsahany hiandry kisoa. 16 Ary satriny hameno ny kibony tamin'ny voan-kazo fihinan'ny kisoa, fa tsy nisy nanome azy. 17 Ary raha nody ny sainy, dia hoy izy: Indrisy maro ny olona karamain'ny raiko manan-kanina be dia be, fa izaho kosa maty mosary eto! 18 Hiainga aho, dia hody any amin'ny raiko ka hanao aminy hoe: Raiko ô, efa nanota tamin'ny lanitra sy teo anatrehanao aho 19 ka tsy miendrika hatao hoe zanakao intsony; fa ataovy tahaka ny anankiray amin'ny olona karamainao aho. 20 Dia niainga izy ka nankany amin-drainy. Fa raha mbola lavitra izy, dia tazan-drainy, ary onena azy izy ka nihazakazaka, dia namihina ny vozony sady nanoroka azy. 21 Ary ilay zanany nanao taminy hoe: Raiko ô, efa nanota tamin'ny lanitra sy teo anatrehanao aho ka tsy miendrika hatao hoe zanakao intsony. 22 Fa rainy kosa nanao tamin'ny ankizilahiny hoe: Alao haingana ny akanjo tsara indrindra ka ampiakanjoy azy; ary asio peratra ny tànany sy kapa ny tongony; 23 ary ento ny zanak'omby nafahy, ka vonoy; ary aoka isika hihinana sy hifaly; 24 fa ity zanako ity efa maty, fa velona indray, ary efa very, fa hita indray. Dia nifaly izy.1-Ratsy ny miala ao an-tranon-dray
Araho tsara ny fizotran’ny fiainan’ity tovolahy ity (and11-16) . Tao an-tranon-drainy izy no nonina sy nipetraka tamin’ny voalohany . Lazaina hoe: milamina ny fiianan’ny zanaka ao an-tranon-dray raha ny marina satria ny tena ray dia mihevitra hatrany izay hahasoa ny zanany sy manomana ny hoaviny .
Nangataka tamin-drainy anefa ilay zazalahy hanome azy ny anjara lovany ary lasa izy niala tao an-tranon-drainy ka nankany an-tany lavitra . Hiala ao an-tranon-drainy izy izany mba hiaina tamin’ny fiveloman-dratsy izy . Tsy mahagaga izany satria ny “lovany”rehetra no nentiny ary azo heverina fa vola sy fananambe izany , kanefa tsy nahay nitantana izy ka lanilany tamin’ny tsy misy dikany akory . Taty aoriana dia lasa “nahantra indrindra izy” ka ny voankazo fihinan-kisoa sisa no hany azony hohanina . Mariho tsara ny fitongonan’ny fiainany rehefa niala tao an-tranon-drainy izy .
2-Ilaina ny miverina ho ao an-tranon-dray
Voalaza eto hoe: “raha nody ny sainy” , izany hoe: izay izy vao nieritreritra izay tokony hataony sy izay mety aminy , dia ny hiverina ho ao an-tranon-drainy satria mahatsara azy izany . Teo aloha mantsy dia mbola notampohan’ny nikirakira volabe sy harembe dia tsy nihevitra izay tokony hataony velively , fa rehefa voadona izany ny olona vao mihevitra izay tokony hataony .Omena antsika izao teny anio izao mba hilazana fa miandry voadona tahaka ity tranga ity vao hody ny saina ka hahatsapa ny hatsaran’ny ao an-tranon-dray.
Fanontaniana :
Vonona mandray ny olona miverina Aminy ve ny Tompo Andriamanitra?
Sampana Sekoly Alahady FOIBE FJKM